Ресейден ет өнімдерін әкелуге салынған тыйым қашан жойылады

Оның айтуынша, шектеулер Қазақстанмен шекаралас Ресей өңірлеріндегі эпизоотиялық жағдайға байланысты енгізілген.

— Біз ақпарат алдық, соның ішінде Россельхознадзор тарапынан мәлімет болды. Осы орайда Қазақстан аумағына қауіпті аурудың таралуына жол бермеу мақсатында малды, ет өнімдері мен жем-шөпті әкелуге шектеулер енгізілді, - деді Азат Сұлтанов Парламент Мәжілісінде тілшілер сұрағына жауап бере отырып.

Вице-министрдің сөзіне қарағанда, жақында Ресей Федерациясы Ауыл шаруашылығы министрінің сапары барысында Қазақстан мен Ресей арасындағы өзара шектеулер мәселесі талқыланды. Осыған ұқсас шаралар ЕАЭО-ның басқа елдерінде де қолданылады.

— Мәселен, қандай да бір қауіп анықталса, мұндай ақпарат бізге халықаралық ұйымынан жолданса, мұндай шектеулерді енгіземіз. Жалпы, бұл қалыпты тәжірибе», - деді ол.

Вице-министр егер жағдай тұрақтанса және белгілі бір мерзімде аурудың жаңа ошақтары болмаса, шектеулер толығымен немесе ішінара жойылуы мүмкін екенін айтты.

— Біз өңірлер бойынша принципін ұстанатын боламыз, яғни ауру таралмаған немесе індет тіркелмеген өңірлер ашылады. Өйткені бізде ауыл шаруашылығы өнімдерінің өзара саудасы өте белсенді. Бұл мәселе келесі айда қаралады», - деді Азат Сұлтанов.

Бұдан бұрын хабарланғандай, биыл ақпан айында ҚР АШМ Ветеринариялық бақылау және қадағалау комитеті Ресейдің бірқатар өңірінен мал мен ет жеткізуге енгізілген тыйымның себебін атады.