Ресейдің мыңдаған ескі көлігін Қазақстанда сату отандық нарыққа әсер ете ме?

Egemen.KZ парақшасынан алынған ақпаратқа сәйкес, Qazaq24.com хабарлайды..

Ресейде қолданыста болған 50 мың автокөліктің Қазақстанда сатылымға шығарылуы отандық нарыққа қалай әсер етеді? Көршілес елде жаңа жылдан бастап лизингте болған, алайда келісімшарт талаптары бұзылғандықтан иелерінен қайтарылған автокөліктер 5-40 пайыз аралығындағы жеңілдікпен сатылады, деп хабарлайды Egemen.kz.

Сарапшылардың пікірінше, бұл көлемдегі автокөліктердің жаппай Ресейден Қазақстан нарығына жеткізілуін күтуге негіз жоқ. Мамандардың есебінше, Қазақстанға бұрын айдалған көліктердің тек 20 пайыздан астамы келеді.

«Мәселен, нарықта автокөліктің бағасы 10 млн теңге делік. Егер олар оны 40 пайыз жеңілдікпен ұсынса, тұтынушы, әрине, барып сатып алуы мүмкін, бірақ бұл жағдайда қосылған құн салығын төлеуге тура келеді. ҚҚС мөлшері де артады. Сондықтан бәрі бағаның қаншалықты тартымды болуына байланысты. Дегенмен лизинг берушілер көлікті өздеріне зиян келтіретіндей тым арзан бағамен сата қояды деп ойламаймын», дейді «Жалпы жол» жол қозғалысы қауіпсіздігі қауымдастығы» қоғамдық бірлестігінің президенті Арсен Шакуов.

Автокөліктердің негізгі бөлігін ресейлік тұтынушылар сатып алуы ықтимал. Себебі Ресейдің өз ішінде бұл машиналар қосымша шығынсыз, яғни қосылған құн салығы мен кедендік бажсыз, айтарлықтай арзанға түседі.

Сонымен қатар 2026 жылы Ресейдегі таксопарктер өз өндірісіндегі автокөліктерге көшуі тиіс. Бұл нарыққа 800 мыңға дейін пайдаланылған шетелдік көліктің шығуына әкелуі мүмкін. Сарапшылардың айтуынша, бұл машиналардың бір бөлігін такси жүргізушілерінің өзі сатып алады, ал негізгі үлесін соңғы бірнеше жыл бойы автокөлік тапшылығын сезініп отырған Ресейдің ішкі нарығы сіңіреді.

«Бұл автокөліктерді ішкі нарық оңай қабылдайды деп ойлаймын әрі сұраныс та жоғары болады. Себебі такси саласында негізінен екі-үш жыл ғана пайдаланылған, аса ескі емес көліктер қолданылады. Бұл – Ресей нарығы үшін өте тартымды сегмент. Сондықтан олар неге бізге келуі керек? Қазақстанда автокөлік тапшылығы жоқ, керісінше, жаңа зауыттар салынып жатыр», дейді автоcарапшы Алексей Алексеев.

Дегенмен бұл автокөліктердің белгілі бір бөлігі Қазақстан нарығында да пайда болуы мүмкін. Алайда утиль алымы мен кедендік баж салығына байланысты көліктерді елге әкелу әлі де қымбат болып отыр. Сол себепті, мамандардың айтуынша, Қазақстанға тек жеке жеткізілімдер, арнайы тапсырыстар, сирек модельдер немесе отандық нарықта баламасы жоқ қозғалтқышы бар автокөліктер әкелінеді.

Соңғы жаңалықтар