Respublica электротехникалық өндіріс орнында болды

Respublica сайлауалды штабының өкілдері Астанадағы өндіріс орнына барып, қала мен елдің энергетикалық инфрақұрылымына қажетті жабдықтардың қалай жасалатынымен танысты, - деп хабарлайды Aikyn.kz сайты Respublica партиясының баспасөз қызметіне сілтеме жасап.

Солардың бірі – 20 кВ-тық ұяшық. Ол Астанада 2017 жылдан бері орнатылып келеді. Осы жылдар ішінде өзінің сенімділігін дәлелдеген. Өндірістік алаңының аумағы шамамен – 7 мың шаршы метр. Мұнда зертхана мен жеке өндірістік учаскелер жұмыс істейді. Құрылтай депутаттығына кандидат Тахмина Нагуманова мұндай кәсіпорындарды елдің мақтанышы деп атап, отандық бизнесті қолдау Respublica-ның негізгі басымдықтарының бірі екенін жеткізді.

«Сіздер жай ғана жұмыс істеп отырған жоқсыздар. Өнім шығарып, халықты жұмыспен қамтып, ел қазынасын толықтырып отырсыздар. Сондықтан отандық бизнестің мүддесі экономикалық саясаттың өзегінде тұруы керек», – деді Respublica партиясының өкілі.

Энергетика және түсті металлургия саласында 14 жыл еңбек етіп келе жатқан Respublica партиясы Түркістан облыстық филиалының төрағасы Бекжан Айтқұлов өндіріс саласының мәселелерін жақсы білетінін айтты.

Оның сөзінше, бүгінде кәсіпкер үшін сапалы өнім шығару аздық етеді, оны өткізетін нарық та керек.

«Алдымен өз нарығымызды отандық өніммен қамтамасыз етуіміз керек. Одан кейін экспортқа шығуымыз қажет. Сонда жаңа нарық ашылып, валюталық түсім көбейеді, экономика үшін қосымша мүмкіндіктер пайда болады», – деді Respublica партиясының мүшесі Айтқұлов.

 Кәсіпорын жұмысшылары кандидаттарға салық жүктемесіне қатысты да сұрақ қойды. Құрылтай депутаттығына кандидат әрі Respublica партиясының мүшесі Сәкен Карин әлеуметтік төлемді оңтайландыру және жұмыс берушілер үшін салық жүйесін одан әрі жеңілдету қажеттігін айтты.

Кездесуде міндетті әлеуметтік медициналық сақтандыру (МӘМС) мәселесі де көтерілді. Жұмысшылар емханалардағы ұзын-сонар кезекке және кей жағдайда жекеменшік клиникаларға жүгінуге мәжбүр болатынына алаңдаушылық білдірді. Даурия Байконова медициналық сақтандыру жарнасын төлейтін адам клиниканың меншік нысанына немесе қай өңірде орналасқанына қарамастан, сапалы медициналық көмек алуға тиіс екенін атап өтті.

Білім беру мәселесі де назардан тыс қалмады. Кәсіпорын қызметкерлері мамандар даярлау жүйесінің бүгінгі экономика талаптарына қаншалықты сай келетінін сұрады. Олжас Құспеков білім беру жүйесін еңбек нарығымен тығыз байланыстыру қажеттігін айтты. Ал Екатерина Смолякова дуалды білім беруді дамыту, маман даярлау ісіне кәсіпорындардың қатысуын кеңейту және технология мен жасанды интеллекттің дамуын ескере отырып, Кәсіптер атласын тұрақты түрде жаңартып отыруды ұсынды.

 Кездесуде тұрғын үй мәселесі де қозғалды. Қазір көпшілікке қолайлы тұрғын үй бағдарламаларының бірі аяқталғаннан кейін, жас мамандар үшін баспана мәселесі қайтадан өзекті бола түсті. Тоқтар Болысов ірі қалаларда жас мамандарға арналған қолжетімді жалдамалы тұрғын үйді дамыту туралы ұсынысын айтты.

Бұл жастарға еңбек етіп, аяққа тұруға және сонымен бірге бастапқы жарнаға қаражат жинауға мүмкіндік береді. Кездесу барысында бір нәрсе анық көрінді: өндірісті жұмыс істеп жүрген адамның күнделікті мәселелерінен бөліп қарау мүмкін емес. Салық, жалақы, медицина, білім, баспана мен энергетика – бір-бірімен тығыз байланысты мәселелер. Сондықтан Respublica экономиканы дамытуды тек көрсеткіштермен өлшемей, оны күн сайын маңдай терімен қалыптастырып жүрген адамның мүмкіндігімен байланыстырады.