Республика күніне орай Алматыда төрт мектеп ашылады

Алматыда осы оқу жылында 24 мектеп ашылады. Бұл мегаполис тарихында бұрын-соңды болмаған оқиға.

Соның бірі - Медеу ауданындағы №220 жалпы білім беретін мектеп. Ол «Келешек мектептері» ұлттық жобасы аясында салынған. Заманауи талапқа сай әрі еңселі кешенді қала әкімінің орынбасары Азамат Қалдыбеков, білім басқармасының басшысы мен ұстаздар қауымы аралап, оң бағасын берді.

Алматыда Республика күніне орай 4 мектеп есігін ашады. Оқушы қабылдауға дайын мекеменің бірі – мемлекеттік тілде білім беретін №220 мектеп. Осында екінші тоқсаннан бастап 1778 бала оқуын жалғастырады. Олар заман талабына сай жабдықталған 83 кабинетте сабақ оқиды. Оған қосымша роботтоехника, домбыра, хореография сынды көптеген үйірме бар. Тіпті оқушылар үшін теннис корты мен коворкинг орталығы да қарастырылған.

Манат Әшірбекова, №220 жалпы білім беретін мектеп директоры:

- Баланың жан-жақты дамуына барлық жағдай жасалған. Мектеп асханасында 340 орындық, 400 орынға лайықтап жасалған мәжіліс залы, 4 спорт зал бар. Оның екеуі жоғары сынып оқушыларына арналған.

Қала әкімінің орынбасары Азамат Қалдыбековтың айтуынша, жыл басынан бері 12 мектеп ашылған. Тағы жеке инвестиция есебінен салынып жатқан 8 білім ұясының құрылысы жыл соңына дейін аяқталады.

Азамат Қалдыбеков, қала әкімінің орынбасары:

- Республика күніне орай Алматы қаласында 4 осындай жаңа мектептің ашылуы күтілуде. Жалпы осы жылы жыл басынан бері 12 мектеп ашылды. 4 мектеп, тағы да 8 мектептің құрылысы жүріп жатыр. Бұл дегеніміздің барлығы Алматы қаласының білім саласындағы инфрақұрылымның дамуына серпінін тигізеді.

«Келешек мектептері» ұлттық бағдарламасы аясында салынған №220 жалпы білім беретін мектептің салтанатты ашылу рәсімі 24 қазан күні өтеді. Оқушылар екінші тоқсаннан бастап жаңа кабинеттерде білім алады.

Авторлары: Аршын Кемелжан, Кенже Амраев