Режеп Тайип Ердоған: Жаңа Конституция Қазақстанның бірлігін одан әрі нығайтады

Түркия көшбасшысы екі ел арасындағы қарым-қатынас кеңейтілген стратегиялық әріптестік аясында барлық бағыт бойынша нығайып келе жатқанын атап өтті.

"Қадірлі бауырыммен өткізген кездесуде саудадан бастап энергетика, қорғаныс өнеркәсібі, көлік-логистика салаларындағы ынтымақтастық, сондай-ақ жаһандағы өзекті мәселелер секілді көптеген тақырыпта пікір алмастық. Біз сауда айналымын 15 миллиард долларға жеткізуге ниетті екенімізді растадық. Осы орайда 15 сәуірде Астанада өткен Үкіметаралық экономикалық комиссияның 14-ші отырысында қабылданған 67 тармақтан тұратын Іс-қимыл жоспарын жүзеге асырудың маңызына тоқталдық. Инвестиция саласында компанияларымызды ынталандыруды жалғастырамыз. Бүгінгі бизнес-форум сияқты іскерлік ортаны біріктіретін іс-шаралар екі елдің сауда-экономикалық байланыстарын нығайту тұрғысынан аса маңызды деп санаймын", – деді Түркия Президенті.

Кеңес отырысында Қазақстан тарапынан Премьер-Министрдің орынбасары – Ұлттық экономика министрі Серік Жұманғарин мен "Самұрық-Қазына" акционерлік қоғамы басқармасының төрағасы Нұрлан Жақыпов баяндама жасады.

Ал Түркия тарапынан Сыртқы істер министрі Хакан Фидан мен Сауда министрі Болат Өмер сөз сөйледі.