Рухани алаяқтар : Айдос Сарым эзотериктер мен тренер коучтерді сынға алды

Депутат соңғы уақытта елде кеңінен таралып кеткен эзотерикалық, псевдопсихологиялық жалған ілімдер мен секталардың әсіре белсенділігі қатты алаңдатып отырғанын жеткізді.

Оның айтуынша, жалған диплом жасатып, атағы жер жаратын «академиялардың», әлемдік «ұйымдардың» атынан сөз сөйлеп жүрген бақсы-құшнаштың, тренер-коучтердің шараларының саны күн санап артып келеді.

– Қай бір сайтты, әлеуметтік желіні ашып қалсаң, әлемнің барша құпиясын меңгерген, адамның жан дүниесінің бүкіл кілтін беліне байлаған мамансымақтар көпшілікпен кездесулер, курстар, семинарлар өткізіп жатады. Өкініштісі, бұны жекелеген адамдардың өз таңдауы, жеке құқығы деп те айта алмаймыз. Рухани алаяқтар мемлекететтік мекемелерге, квазимемлекеттік сектордағы ұйымдарға дейін жетіп, мемлекеттік, қоғамдық проблемаға айналғанын байқап отырмыз, – деді А.Сарым Мәжілістің жалпы отырысында.

Депутат «Сюцай» деп аталатын курстарды мысалға келтірді.

– Бұл бағыт «адамның ішкі әлеуетін ашатын сандық психология» деп таныстырылғанымен, іс жүзінде ғылыми негізі жоқ, эзотерикалық және діни сипаттағы коммерциялық жобаға айналып отыр. Бүгінде «Сюцай» атауын жамылған топтар жабық форматтағы шаралар өткізіп, өз уағыздарын кеңінен таратып жүр. Олардың басым бөлігі – лицензиясыз, сертификатсыз, тіркелмеген тұлғалар. Жалған ілімнің басты мақсаты – азаматтарды «рухани даму» ұранымен иландырып, сандар мен символдарға сүйенген псевдотеория арқылы материалдық пайда табу. Нәтижесінде көптеген адам, әсіресе әйелдер мен жастар, қаржылай шығынға ұшырап, психологиялық тәуелділікке түсуде, ал кейбірі отбасылық және әлеуметтік күйзеліске тап болып отыр, – деп толықтырды депутат.

Мәжіліс депутаты бұл үрдісті «рухани індет» немесе «менталдық эпидемия» деп атады.

– Мемлекеттік органдар мұндай ұйымдардың қызметіне мониторинг жасап отыр ма? Осындай ұйымдар мен коуч-тренерлер тарапынан жастарымызға, әйелдерге және өзге әлеуметтік топтарға келтіріліп жатқан психологиялық, материалдық және басқа да зияндарды жүйелі түрде зерттейтін тәсілдер мен сараптамалар бар ма? Меморгандар бұл деструктивті қызметке қатысты заңнамалық немесе нормативтік деңгейде шара қабылдауды жоспарлап отыр ма? Халық арасында БАҚ арқылы ақпараттық-түсіндіру жұмыстары жүргізіле ме? Мұндай жұмысты жүзеге асыру үшін қажетті ғылыми, кадрлық әлеует пен құралдар бар ма? – деп сауал қойды А.Сарым.

Айта кетейік, былтыр Қазақстан азаматтарынан коуч қызметіне 900-ге жуық шағым түскен.