2025 жылы Көлсай көлдері МҰТП аумағына 600 мыңнан астам турист барған

2025 жылы «Көлсай көлдері» МҰТП аумағына 600026 демалушы келген. Ал  туристік рекреациялық қызмет түрлерінен табыс 546, 4 млн теңгені құрады. Бұл туралы «Парктер шеруі» халықаралық экологиялық акциясының қорытындысына арналған баспасөз туры барысында «Көлсай көлдері» МҰТП директорының орынбасары Хамит Ахметов айтты.

Оның айтуынша өткен жылы келушілер саны 450 мың адам деп жоспарланғанымен,  жыл қорытындысы бойынша демалушылар саны әлдеқайда көп болып шыққан.  Оның ішінде шетелдіктер саны 128 160 адамды құраған. Олар Индия, Жапония, Қытай, Корея, Малайзия, Туркия, Франция, Англия, Ресейден келген.

 Экологиялық және танымдық туризмді дамыту мақсатында ұлттық парк аумағында туристер мен демалушыларға арналған 9 туристік маршрут қызмет көрсетеді:

№1 «Саты ауылы-Қайынды көлі»  11 км
№2 «Саты ауылы-Саты асуы» 23 км
№3 «Төменгі Көлсай көлі-Сарыбұлақ асуы» 18 км
№4  «Күрметі ауылы-ортаңғы Көлсай көлі» 17 км
№5  «Күрметі ауылы-Қыземшек тауы» 24,3 км
№6  «Кіші Өрікті сайы-Мәжі көлі» 6 км
№7 «Төменгі Көлсай көлі» 3,5 км
№8 «Таңбалы тас»-  5,5 км
№9 «Алғабас ауылы – Суықтоғай шатқалы» - 4,5 км

«Осы аталған туристік маршруттардың ішінде №1 «Саты ауылы-Қайынды көлі», №3 «Төменгі Көлсай көлі-Сарыбұлақ асуы» демалушылардың көп сұранысына ие. Аталған маршруттарға жыл сайын келушілер саны артуда. Туристік маршруттар жыл бойы келген демалушыларға қызмет көрсетеді. Парк аумағында келген демалушыларға туристік маршруттарда серуендеу, шатыр құру, атпен серуендеу, балық аулау, қайықпен серуендеу  және т.б қызметтер көрсетіледі», - дейді «Көлсай көлдері» МҰТП Экологиялық ағарту және туризм бөлімінің басшысы Руслан Иманбаев.

Оның айтуынша соқпақтарды аббаттандыру бойынша Алматы облыстық туризм басқармасынан ақша қаражаты бөлініп, «Саты ауылы – Қайыңды көлі» туристік маршрутына 150 метр жаяу жүргіншілерге арналған жол жасалған.

 Сондай-ақ, 7 дана рындық, 4 дана стол, 1 дана фотоаумақ рамкасы жасалып, мекеменің арнайы есеп шотынан 2 дана көру алаңы, 3  дана демалушылар отыратын қалқалар, 1 дана жаяу жүргіншілер өтетін көпірлер орнатылған.
Төменгі Көлсай көлі – Сарыбұлақ асуы» туристік маршрутына арнайы есеп шоттан 3 дана демалушылар отыратын қалқалар, тұрмыстық қалдықтар жинақтайтын орындар жасалған. Төменгі Көлсай көліне  көру алаңы -2 дана,  мүмкіншілігі шектеулі жандарға көл жағалауына түсу үшін арнайы пандус іске қосылған. Ал көлдің бас жағындағы Мыстөбеге жету үшін жаяу жүргіншілерге арналған 30 метр жол мен 1 дана көру алаңы, пирс жасалынды. Қайыңды бақылау өткізу тоспасының орны көшіріліп, электронды шлагбаум орнатылды. Kaspi QR төлем қабылдау жүйесі қосылды. Көлсай бақылау өткізу тоспасына «Star link»  WI-FI  желісі орнатылды. Автоматтандыру жүйесі іске қосылды. Төменгі Көлсай көліндегі автокөліктер тұратын тұраққа арнайы жолақтар сызылып, көліктердің ретпен орналасуына жағдай жасалынды. Ұлттық парктің арнайы есеп шотынан 208 дана ақпараттық  тақталар мен аншлагтар жасалған.  

Хамит Ахметовтың айтуынша Ұлттық паркте экологиялық ағарту, тазалық жұмыстары басты назарда.  

«Жыл сайын ұлттық парк аумағында еркітілердің, мектеп оқушыларының, студенттердің,  ұлттық парк инспектроларының қатысуымен экологиялық акциялар өткізіледі. Экологиялық акция кезінде туристік маршруттар бойына, парк аумағына тазалық жұмыстары жүргізіледі. Өткен жылы Ұлттық парк аумағында «Таза Өлке», «TazaLike», «Таза аймақ», «Таза Қазақстан», «Бүкіл Қазақстандық ағаш отырғызу» экологиялық акциялары  22 рет өткізіліп, 2097 адам қатысты», – дейді ұлттық парк директорының орынбасары. 

Бұдан бөлек Ұлттық парк аумағының тазалығын қадағалау мақсатында мекеменің арнайы есеп шотынан 12 тазалықшы жұмысқа алынған. Олар негізінен Көлсай, Қайыңды көлдері демалыс аумағында тазалық жұмыстары жүргізеді. Жалпы 2025 жылы парк аумағынан 108 тонна қатты тұрмыстық қалдықтар жиналып, Саты ауылдық округі әкімшілігіне қарасты арнайы жасалған полигонына  шығарылған.