Жыл басынан бері Көлсай көлдеріне 121 мыңнан астам турист келді Хамит Ахметов

Фотоларды түсірген: Досжан Балабекұлы
Жыл басынан мамыр айына дейін бері «Көлсай көлдері» МҰТП аумағына 121 962  адам келген. Оның ішінде 48 140 адам шетелдік. Олар негізінен Үндістан, Жапония, Қытай, Корея, Малайзия, Түркия, Францияның азаматтары. Бұл туралы «Парктер шеруі» халықаралық экологиялық акциясының қорытындысына арналған баспасөз туры барысында «Көлсай көлдері» МҰТП директорының орынбасары Хамит Ахметов айтты.

Оның айтуынша биыл келушілер саны өткен жылдан асады деп күтілуде. 2026 жылға жоспар бойынша туристік рекреациялық қызмет түрлерінен жоспар 675 368,7 мың теңге болса, қазірге дейін 138 265,9 мың теңге орындалған.

Руслан Иманбаев

«Туристерге барлық жағдай жасалған. Парк аумағында келген демалушыларға туристік маршруттарда серуендеу, шатыр құру, атпен серуендеу, балық аулау, қайықпен серуендеу  қызметтері көрсетіледі», - дейді «Көлсай көлдері» МҰТП Экологиялық ағарту және туризм бөлімінің басшысы Руслан Иманбаев.

 Оның айтуынша экологиялық және танымдық туризмді дамыту мақсатында ұлттық парк аумағында  9 туристік бағыт: «Саты ауылы-Қайынды көлі»  11 км,  «Саты ауылы-Саты асуы» 23 км, «Төменгі Көлсай көлі-Сарыбұлақ асуы» 18 км, «Күрметі ауылы-ортаңғы Көлсай көлі» 17 км, «Күрметі ауылы-Қыземшек тауы» 24,3 км, «Кіші Өрікті сайы-Мәжі көлі» 6 км, «Төменгі Көлсай көлі» 3,5 км,  «Таңбалы тас»-5,5 км, «Алғабас ауылы – Суықтоғай шатқалы» - 4,5 км, жұмыс істеп тұр.
Ұлттық парк аумағында экологиялық ағарту мен тазалыққа ерекше мән береді. 

«Еріктілердің, мектеп оқушыларының, студенттердің, инспекторлардың қатысуымен «Таза Өлке», «TazaLike», «Таза аймақ», Таза Қазақстан, «Бүкіл Қазақстандық ағаш отырғызу экологиялық акциялары» жыл бойы өткізілді. Биыл «Таза Қазақстан» экологиялық акциясын 26 рет өткізіп, 2406 адам қатысты. 5215 дана ағаш отырғызылып, 3,2 тонна қоқыс шығарылды. Жалпы жыл басынан бері парк аумағынан 36 тонна қатты тұрмыстық қалдықтар жинақталды», - дейді парк директорының орынбасары Хамит Ахметов.

2026 жылы жалпы ұлттық парк аумағынан туристік рекреациялық мақсатта пайдалану үшін 19 ұзақ мерзімді және 6 қысқа мерзімді жер учаскесі пайдалануға берілген. Жер пайдаланушылар тарапынан Көлсай, Қайыңды, Күрметі сайларына визит-орталықтар салу, эко қонақ үйлер, глэмпингтер, қоғамдық тамақтандыру орындары мен Төменгі және Ортаңғы Көлсай көлінің арасын байланыстыратын аспалы жол салу сияқты инвестициялық жобаларды іске асыруға арналған жоспар бар.

Мұның сыртында биыл Ұлттық парк аумағында туристік инфрақұрылымды дамыту мақсатында төменгі Көлсай көлінің сол жақ жағалауынан қайық тұрағына дейінгі аралықта ұзындығы 370 метр, ені 2 болатын темір соқпақ салу, 1 дана көру алаңы,  4 дана от жағатын орын даярлау, Көлсай бақылау-өткізу тоспасының орнын өзгерту және 3 жолақты автоматтандырылған шлагбаум жасау жоспарланған.

Қайыңды көлінің жағасына орнатылатын көру алаңының сызбасы

«Көлсай көлдері» МҰТП Қарабұлақ орманшылығының орманшысы Асхат Нұрдәулетовтың айтуынша Қайыңды бақылау өткізу тоспасына автоматтандыру жүйесін орнатылып, Қайыңды демалыс аумағындағы автотұрақты қоршалмақ.
 

«Бұдан бөлек Қайыңды көлінің жағасында көру алаңын және 2 дана от жағатын орын жасалып, автотұраққа  дәретхана орнатылып, Қайыңды көліне ұзындығы 450 метр, ені 120 см болатын  жаяу жүргіншілер жолын салынады», - дейді Асхат Нұрдәулетов.

Айта кетейік, азіргі кезде Саты ауылы мен Қайыңды көлінің арасын жалғайтын жол салынуда. Саты ауылдық округының әкімі Нұрым Сағымжанның айтуынша жалпы ұзындығы 9,9 шақырымды құрайтын аудандық маңызы бар жолды күрделі жөндеу жұмыстары бекітілген кестеге сәйкес жүргізіліп жатыр. Құны 2,43 млрд теңге болатын жоба жергілікті бюджет есебінен қаржыландырылған. Ал негізгі жұмыстар жол жабынының сапасын жақсартуға және жол қозғалысы қауіпсіздігін арттыруға бағытталған.

Саты ауылдық округының әкімі Нұрым Сағымжан

«Жұмысты мердігер «Сервис НС» ЖШС жүргізуде. Құрылыс жұмыстары күзде жоспарланған мерзімде аяқталады», - деді ауыл әкімі.  

Айта кетейік, қазіргі таңда Қайыңды көліне тек жол талғамайтын көлікпен жетуге болады. Бұған қарамастан өткен жылы көлге 200 мың турист келген.

Ұлттық парк директорының орынбасары Хамит Ахметовтің айтуынша жол салынып, жоспарланған инвестициялық жобалар іске асса алдағы уақытта туристік сервис сапасы мен келушілер санының артады.