2025 жылы ШҚО ға барған турист саны артты

2025 жылы Шығыс Қазақстан облысына саяхаттап барған турист саны 10 пайызға артты.

400 мыңға жуық адам өңірдің табиғатын тамашалап, тарихи орындарын аралаған. Жалпы туризм саласын дамытуға 15 миллиард теңге  инвестиция  жұмсалды. Дегенмен, салада шешімін таппаған мәселелер бар. Кейбір демалыс орындарына апаратын жолдардың сапасы сын көтермейді. 

Кенді Алтайдың жазы да, қысы да керемет. Қарға оранған қазіргі кейпін көргісі келетіндер көп. Астаналық Жандос Сапаров отбасымен бірге таулы Үлбіні тамашалауға арнайы келіпті. 

Жандос Сапаров, Астана қаласының тұрғыны:

- Қарақолда, Шымбұлақта, Ақбұлақта болдым. Әр жақтың өз ерекшелігі бар. Бірақ Алтай таулары ғажап екен, қар құрсап жатқан кезі тіпті әдемі. 

Эльмира Ахметова, тілші:

- Өлкеде еліміздің ғана емес әлемнің әр түкпірінен келген туристер жиі ұшырасады. 2025 жылы 14 мың шет елдік демалған. Бұл жақта саф ауа, сыңсыған орман, асқар шың, бұлқынған Бұқтырма, маржандай Марқакөл бар. Алтайдың табиғаты жылдың қай мезгілінде болсын келген адамды тамсандырмай қоймайды. Қонақтарды қызықтыратын тұсы көп. 

Салада қордаланған мәселе де аз емес. Александр Чиликин қысқы туризмнің қыр-сырын жақсы біледі. Ондаған жылдан бері осы бағытта еңбек етіп жүр. Айтуынша, кәсібін кеңейткісі-ақ, келеді, бірақ, жер тапшы. Қосымша ғимараттар салып, аспалы жол тартайын десе, орман қорына тиесілі аумаққа еніп кетеді.

Александр Чиликин, кәсіпкер:

- Тау шаңғы курорты тек шаңғы тебуден ғана тұрмайды.Бұл қаншама  шақырымға созылған аспалы жол, дәмханалар мен спорттық жабдықтар. Қыруар қаражат кетеді.Әрине орман аумағын оңды-солды беруге болмайды. Дегенмен, біз миллиондаған евро тұратын инвестиция жайлы айтып отырмыз. Сондықтан осыған байланысты сұрақ шешілсе дейміз. 

Десе де, туризм саласындағы кәсіпкерлерге мемлекеттен нақты қолдау бар. Туристік база салу және жаңғырту бойынша кеткен шығынның бір бөлігі субсидияланады. Тағы бір өзекті мәселе жол жайы. Кей жолдың сапасы сын көтермейді. Дегенмен, кезең-кезеңмен жөндеп жатырмыз- дейді жауаптылар. Курортты аймаққа апаратын 65 бағыт бойынша жол жаңғыртылды. Тағы бір проблема маман тапшылығы мен сервистік қызмет сапасының нашарлығы. 

Сымбат Рамазанов, ШҚО кәсіпкерлер палатасының туризм бойынша кеңес төрағасы:

- Туристік локациялардың барлығы облыс орталығынан аудан орталығынан шет жерде орналасұан оларға жету үшін 200-300-500-700 шақырым керек. Ол жерде ең басты мәселе инфрастпукиура жол  мәселесі, дәретханалар, жолдағы тамақтану орындары. Екінші үлкен мәселе әр саланы маман жүргізу керек деп ойлайм. Сондықтан бізде әсіресе туризм саласындағы менеджерлер гидтер өте тапшы. 

Әзірге полиглот гид дайындау облыстағы мансап орталығына міндеттеліп отыр. Бұл жерде одан бөлек әужайда қызмет көрсететін кадрлар оқытылады. Өйткені өңірде бір емес екі әуе айлағы салынуда.

Арайлым Есімбекова, ШҚО еңбек мобильділігі орталығының директоры:

- Үлкен отбор жасалынды. Қазіргі таңда барлық кезеңнен өткен азаматтар жұмыс берушінің жұмыс орнында алты айлық оқыту курсын өтіп жатыр. Екі аудандағы аэропорттардың халықаралық аэропорттардың құрылысы аяқталып біткенше бұл жердегі мамандар кәсіби даярлықтан өтіп,қолдарына құжаттарын алып жұмысқа дайын болады. 

Туристерді тарту үшін облыста түрлі этнофестиваль жиі ұйымдастырылады. Ұлан ауданындағы Бүркіттөбе басында бес жылдан бері Салбурын өтіп жүр. Айтулы додада саятшылар тілмашсыз ақ тіл табысып, тәжірибе алмасады. Ресейден, Моңғолиядан, Венгрия мен Қытайдан келгендер қыран құсты ұшырып, қызығына түседі.

Болашаққа жоспарланған жоба көп. Марқакөл мен Қытайдың Қанас көлінің арасында маршурт ашу көзделіп отыр. Одан бөлек Риддерде халықаралық стандартқа сай Анатау курорттық базасын салу жоспапы бар. Демек, Шығыс Қазақстаның туризмі қарқынды дамып, өңірге келушілер саны еселеп артады деген сөз.

Эльмира Ахметова, Дмитрий Пыхтин