Run for Autism: AMANAT партиясының қолдауымен ауқымды жарыс ұйымдастырылды

Астанада «AMANAT» партиясының және Астана қаласы әкімдігінің қолдауымен «Bolashak Charity» қоры аутизмі бар және өзге де менталдық бұзылыстары бар жасөспірімдер мен ересектерді қолдауға бағытталған жүгіруден қайырымдылық Run for Autism жарысын ұйымдастырды, - деп хабарлайды Aikyn.kz

Дүниежүзілік аутизм туралы ақпарат тарату айына орай өткізілген іргелі іс-шараға еліміздегі 26 қаладан келген 5000 адам қатысты.

«AMANAT» партиясының Атқарушы хатшысы Дәулет Кәрібек мұндай игі іс-шара аутизмі бар балалар мен ересектерді қолдауға бағытталған маңызды бастама екенін атап өтті. 

«Мемлекет басшысы Қасым-Жомарт Тоқаев атап өткендей, баршаға тең мүмкіндік жасау – Әділетті Қазақстанның негізгі қағидаты. «AMANAT» партиясы осы бағытта жүйелі жұмыс жүргізіп, ерекше қажеттілігі бар азаматтарды қолдау, инклюзивті ортаны дамыту және тең мүмкіндік қалыптастыру бойынша нақты бастамаларды тұрақты түрде жүзеге асырып келеді. Бүгінгі Run for Autism қайырымдылық іс-шарасы – қоғамдағы жанашырлық пен бірліктің жарқын көрінісі. Қазақстанның түкпір-түкпірінен және шетелден мыңдаған адамның Астана төрінде бас қосуы – инклюзивті қоғам құруға деген ортақ ұмтылыстың белгісі. Осындай игі жобалар арқылы біз әр адамның қоғам өміріне толыққанды араласуына жол ашамыз. Ең бастысы, бұл жарыс – мейірім мен қолдаудың үлкен мерекесі», – деді ол.

Жарыстың мақсаты – қоғамның аутизм туралы хабарын арттыру, аутизмі бар адамдардың тұрмысын жақсарту және олардың әлеуметтік ортаға бейімделуіне жағдай жасау.

Осы орайда, «Bolashak Charity» ҚҚ Қамқоршылық кеңесінің төрайымы Динара Гаплан аталған бастаманың мәні мен маңызына тоқталды. 

«Run for Autism – ерекше іс-шара, өйткені оған біздің жобаларымыздағы жасөспірімдер, олардың отбасылары, педагогтер, серіктестер және қор достары қатысады. Сондықтан бұл жүгіру жарысы жай ғана іс-шара шеңберінен шығып, түрлі қалалардағы адамдарды ортақ идея төңірегіне біріктіретін шынайы қозғалысқа айналды. Біз жобаны бастаған кезде қоғам назарын аутизм мен менталдық денсаулық тақырыбына аударуды мақсат еттік. Бүгінде мыңдаған адам бізбен бірге стартқа шығады. Бұл қоғамның барған сайын ашық, саналы болып, маңызды әлеуметтік бастамаларды қолдауға дайын екенін көрсетеді», – деді ол.

Жарыс жүлдегерлері медальдармен және дипломдармен марапатталып, естелік сыйлықтар табысталды.