Саакашвили грузин түрмесіндегі адам төзгісіз жағдайлар туралы айтты

Грузияның бұрынғы президенті Михаил Саакашвили өзінің Facebook парақшасында Рустави қаласындағы түрменің жалғыз адамдық камерасында қалай отырғанын айтып берді, деп хабарлайды Tengrinews.kz Грузия-Онлайн сайтына сілтеме жасап.

Ол "кішкентай, қараңғы, тарақан қаптаған және нашар желдетілетін камерада" отырғанын, ал дәретхананың орнына "чечма" деп аталатын шұңқырды пайдаланатынын мәлімдеді.

Оның айтуынша, ондағы барлық саяси тұтқын осындай жағдайда ұсталып отыр.

"1 қазанда менің қамауда отырғаныма бес жыл болады - бұл Сервантестің тұтқында болған уақытымен бірдей. Халықаралық нормаларға сәйкес, жалғыз адамдық камерада мұншалықты ұзақ отыру азаптау мен қатігездікке теңестіріледі. Түрме Руставидегі Иванишвилиге тиесілі цемент зауытының жанында орналасқан, сондықтан үстімізге үнемі кәсіпорынның канцерогенді шаңы жауып тұрады, соның салдарынан тыныс алу қиындап кетті", - деп жазды экс-президент әлеуметтік желіде.

"Тұтқындардың 99 пайызынан айырмашылығым - осы уақыт бойы заң рұқсат берсе де, маған телефон соғуға тыйым салынды. Тек кейінгі кездері маған Алисамен аптасына бірнеше минут сөйлесуге рұқсат берді. Маған Украина консулымен кездесуге, украиналық баспа басылымдары мен видеоматериалдарды алуға рұқсат бермей отыр. Менің адвокаттарыма түсініксіз себептермен фотосуреттерді, соның ішінде балаларым мен немеремнің суреттерін алып келуге тыйым салынған. Бұған қоса, көптеген халықаралық, үкіметтік және парламенттік делегацияның маған келуіне бірнеше рет тыйым салынды", - деді Саакашвили.

"Бір сөзбен айтқанда, маған әскери тұтқын ретінде қарайды, тек олардың ресейлік бастықтарынан айырмашылығы - Женева конвенциясын сақтамайды. Мұның бәрі, сондай-ақ қамаудың басындағы азаптаулар мен уландырулар, әрине, менің сағымды сындыруға бағытталған. Бірақ Иванишвили де, оның "Коцеби" қорқаулары да және оның Мәскеудегі қожайыны да бұған ешқашан қол жеткізе алмайды", - деп түйіндеді бұрынғы мемлекет басшысы.

Михаил Саакашвили 2004-2013 жылдар аралығында қатарынан екі мерзім бойы Грузия президенті қызметін атқарды. Ол 2013 жылы президенттік мерзімі аяқталғаннан кейін Грузиядан кетіп қалған. "Грузия арманы" партиясының жаңа үкіметі оған қарсы төрт қылмыстық іс қозғады. Оның екеуі бойынша саясаткер сырттай үш және алты жылға бас бостандығынан айырылды.

2021 жылдың қазанында Саакашвили Украинадан Грузияға жасырын түрде оралды, ол жерде президент Владимир Зеленскийдің кеңсесінде жұмыс істеген болатын. Ол кезде саясаткер ұсталып, оған шекараны заңсыз кесіп өтті деген жаңа айып тағылды. 2025 жылдың наурызында сот оны осы іс бойынша 4,5 жылға түрмеге кесті.

Бұл мерзімге Саакашвили бұрын 9 жылға сотталған "пиджактар ісі" бойынша үкім қосылғаны хабарланды. Нәтижесінде жалпы жаза мерзімі 12 жыл 6 айды құрады.

Google News арқылы жаңалықтарымызды қадағалаңыз