Салық берешегі бар қазақстандықтарға елден шығуға тыйым салынады

2026 жылғы 1 шілдеден бастап компания басшыларына, жеке кәсіпкерлерге және жеке практикамен айналысатын тұлғаларға ірі салық берешегіне байланысты Қазақстаннан шығуға уақытша шектеу қойылуы мүмкін. Мән-жайды Мемлекеттік кірістер комитетінің баспасөз қызметі хабарлады, деп жазады Tengrinews.kz.

2026 жылғы 1 шілдеден бастап компания басшыларына, жеке кәсіпкерлерге және жеке практикамен айналысатын тұлғаларға ірі салық берешегіне байланысты Қазақстаннан шығуға уақытша шектеу қойылуы мүмкін. Мән-жайды Мемлекеттік кірістер комитетінің баспасөз қызметі хабарлады, деп жазады Tengrinews.kz.

1 шілдеден бастап Қазақстанда салық берешегін мәжбүрлеп өндірудің жаңа шарасы күшіне енеді. Мемлекеттік кірістер комитеті (МКК) бұл жаңа шара Салық кодексінде қарастырылғанын хабарлады. Ол заңды тұлғалардың бірінші басшыларына, құрылымдық бөлімше басшыларына, жеке кәсіпкерлерге және жеке практикамен айналысатын тұлғаларға қолданылады. Олардың елден шығуына уақытша шектеу қойылуы мүмкін.

Шығуға шектеу 27 000 АЕК-тен (2026 жылы 116 775 000 теңге) асатын салық берешегі болып, ол 3 айдан астам уақыт бойы өтелмеген жағдайда енгізілуі мүмкін.

Бұл ретте салық мамандары тыйымның автоматты түрде енгізілмейтінін атап өтті.

"Шектеу тек Қазақстанның Азаматтық іс жүргізу кодексінде қарастырылған тәртіппен сот санкциялаған мемлекеттік кірістер органдарының қаулысы негізінде ғана енгізіледі", - деп хабарлады МКК.

Сондай-ақ ведомство заңнамада әлеуметтік кепілдіктер қарастырылғанын атап өтті. Егер адамға шетелге емделуге шығу қажет болса, растайтын медициналық құжаттар болған жағдайда уақытша шектеу белгілі бір мерзімге тоқтатыла тұруы мүмкін.

Шектеуді алып тастау салық берешегі толық өтелгеннен, оның жоқтығы расталғаннан немесе салық міндеттемесі белгіленген тәртіппен тоқтатылғаннан кейін жүзеге асырылады.

Барлық қаулы мемлекеттік кірістер органдары мен Ұлттық қауіпсіздік комитетінің ақпараттық жүйелері арқылы электронды форматта жолданады.

МКК жаңа норма ірі көлемдегі салықтық міндеттемелерді орындаудан жалтарудың алдын алуға және салықтық әкімшілендірудің тиімділігін арттыруға бағытталғанын мәлімдеді.

Жаңа Салық кодексі 2026 жылғы 1 қаңтарда күшіне енді. Қаңтар айында Президент Қасым-Жомарт Тоқаев жаңа кодексті қолдану бойынша жұртшылықтың ұсыныстарын мұқият зерделеуді және қажет болған жағдайда оған түзетулер енгізуді тапсырып, Салық кодексінің "қасиетті жазу емес" екенін мәлімдеген болатын.

Кейінірек вице-премьер Серік Жұманғарин Салық кодексіне түзетулер енгізілуі мүмкін екенін растады. Оның айтуынша, кейбір мәселелер кодекске өзгерістер енгізу жөніндегі жұмыс тобының талқылауына жіберіледі және мұндай өзгерістер жыл соңына дейін пайда болуы мүмкін.

Сондай-ақ біз Салық кодексіне енгізілетін түзетулер жаңа Парламент - Құрылтайда қаралуы мүмкін екені туралы жазған болатынбыз. Ұлттық экономика бірінші вице-министрі Азамат Әмрин үкімет заң жобасын күзде ұсынуды жоспарлап отырғанын хабарлады.

Тағы оқыңыз: "Біз айыппұл салмаймыз". Бизнеске жаңа Салық кодексіне бейімделу үшін уақыт берілді

Google News арқылы жаңалықтарымызды қадағалаңыз