Санжар Боқаев қамауға алынды: іс екі бап бойынша тергелуде

Санжар Боқаев екі айға қамауға алынды. Бұл туралы Бас прокуратура мәлім етті, - деп хабарлайды Tengrinews.kz.

Санжар Боқаев екі айға қамауға алынды. Бұл туралы Бас прокуратура мәлім етті, - деп хабарлайды Tengrinews.kz.

Бас прокуратура мәліметінше, Боқаевқа қатысты іс екі бап бойынша тергеліп жатыр: ҚК-нің 190-бабы 4-бөлігі 2-тармағы "Аса ірі мөлшерде жасалған алаяқтық" және ҚК-нің 340-бабы 3-бөлігі 1-тармағы "Адамдар тобы немесе алдын ала сөз байласу арқылы адамдар тобы жасаған, ағаштар мен бұталарды заңсыз кесу, жою немесе зақымдау".

"2026 жылғы 19 наурызда Алматы қаласы тергеу сотының қаулысымен С. Боқаевқа қатысты екі ай мерзімге күзетпен ұстау түріндегі бұлтартпау шарасы санкцияланды",- деп хабарлады Бас прокуратура.

Еске сала кетейік, 18 наурызда Алматыда блогер Санжар Боқаев ұсталған болатын.

Бас прокуратура мәліметінше, Санжар Боқаев жалған ақпарат тарату және қоғамда теріс пікір қалыптастыру мақсатында әлеуметтік желілерде жеке тұлғалардың қоғамдық саябақ аумағында ағаштарды заңсыз кескені және құрылыс нысандарынан мүлік ұрлағаны туралы видео жариялады деген күдікке ілінген.

"Тергеу дерегіне сәйкес Санжар Боқаев осы қылмыстарды ұйымдастырып, қаржыландырған. Ол үшін табысы төмен адамдарды тартып, оларға ақшалай сыйақы беру арқылы ағаш кесу мен ұрлық жасауға тапсырма берген. Сондай-ақ, ол аса ірі мөлшерде қаражатты алаяқтық жолмен жымқырды деген күдікке ілініп отыр", - деп жазылды сол кездегі хабарламада.

Әлеуметтік желілерде Санжар Боқаевтың ұсталған видеосы пайда болды. Кадрларда Боқаевты арнайы жасақ қызметкерлері қоршап тұрғаны көрінеді.