Сарапшылар конституциялық реформаны талқылады

Қазақстандағы конституциялық реформалар Орталық Азия аймағы үшін де үлкен маңызға ие. Өзбекстанның саяси элитасы осындай пікір білдірді. 

Ташкенттегі Қазақстан елшілігінде көрші елдің заң шығарушы Олий мәжіліс депутаттары мен саясаттанушылары бас қосып, Қазақстандағы реформаларды талқылады. 

Қазақстанда жүргізіліп жатқан саяси экономикалық реформалар өзбекстандық сарапшылардың үнемі назарында. Ресми Астана мен Ташкенттің арасында орнаған жайлы климат екі елдің алыс берісін арттырып, қазір ол 5 млрд долларға жетті. Ендігі меже 2030 жылға дейін 10 млрд-қа апару.

Шерзодхон Кудратходжа, саяси ғылымдар докторы:

- Қазақстан Республикасының Президенті жылдың басында «Түркістан» газетіне сұхбат берді. Мұның да символдық мәні бар деп ойлаймын. Себебі Түркістан бұл түркі халықтары үшін ортақ ұғым, бәріміз түсінеміз. Жақсылап танысып шықтық. Сол сұхбатта Қасым-Жомарт Тоқаев газет оқу мәдениеті жайлы жақсы пікір айтты. Меніңше, бұл үрдіс – қазір күллі жаһанға тән құбылыс. Әлбетте Қазақстанда жасалып жатқан барлық реформаларды бауырлас ел халқы қолдайды. Бұл қадамдар елдің дамуына серпін береді.

Жалпы конституциялық реформалар ел игілігі үшін жасалады. Әлемдік тәжірибеде Ата Заңның заман талабына сай толығып отыратыны тағы бар. Қазақстандағы конституциялық реформаға әр азаматтың үн қосуына мүмкіндік қарастырылған. Ой пікірлерді арнайы комиссия назарға алады. Өзбекстанның заң шығарушы палата депутаттары бұл процесті жоғары бағалады.

Дилором Файзиева, Өзбекстанның Олий Мәжіліс депутаты:

- Біздің Парламент депутаттары Қазақстанда жүргізіліп жатқан контитуциялық реформаларды қолдайды. Талқыға түскен құжатта ұлттық сипат пен мемлекеттік мүддеге басымдық берілген. Бүгінгі жаһандық геосаяси жағдайда бұл құптарлық бастама. Жалпы көрші елдегі реформалар Орталық Азия аймағында тұрақтылық пен қауіпсіздікті, экономикалық өсімді көздейді.

Илхом Абдуллаев, Өзбекстанның Олий Мәжіліс депутаты:

- Қазақстан Президентінің «Заң мен тәртіп» моделі жаңа әділ қоғам қалыптастыруға  әсер етті. Біздің мемлекет басшымыз да осы қағидаттарды ұстанады. Меніңше, бұл бастама – елдің еркін дамуына, экономикалық жоспарларды орындап, инвестиция тартуға таптырмас құрал.

Қазақстандағы саяси реформалар тек ел үшін ғана емес, Орталық Азия аймағы үшін де үлкен маңызға ие. Себебі Қазақстан өңірдің экономикасы ілгері локомотиві. Өзбекстандық депутаттар мен саясаттанушылардың ортақ ойы осындай.