Sarbaz+ жобасы іске қосылды

Жастар әскерде жүріп түрлі дағдыларды меңгеріп, ағылшын тілін үйреніп, шахматтан дәреже ала алады.

Болашақ жұмыс орнын табуы да әбден мүмкін. Қазақстан Қарулы Күштерінде енгізіліп жатқан жаңа форматтың осындай игілігі бар. Пилоттық жоба «SARBAZ+» деп аталады. Ол жауынгерлердің цифрлық дағдыларын дамытуға бағытталған және жеке құрамның қауіпсіздігін барынша қамтамасыз етуді көздейді. Бастама алғаш болып Алматы маңындағы Әуе қорғанысы күштерінің әскери бөлімінде іске асады.

Демалыс күндері 78460 әскери бөлімінің 90 жас сарбазы ант берді. Олар Әуе қорғанысы күштерінің элиталық бөлімінде борышын өтейді. Бөлім қазақстандық әскери ведомство басшылығына және Әуе қорғанысы күштерінің бас қолбасшысына тікелей бағынады. Жеке құрамға ұрыс және әскери-көліктік авиацияны, Қазақстанның әуе кеңістігін бақылайтын құрылғылар арасындағы байланысты қамтамасыз ету жүктелген. 

Ақылбек Көпжасар, қатардағы жауынгер:

- Осы «Сарбаз+» проектіне келгеніме өте қуаныштымын. Алдағы уақытта көреміз. Қандай сертификат алуға болатынын бізге де айтып өтті. Енді алдағы уақытта жақсы оқып, соған талпынуға тырысамын.

Әскери бөлімнің мәртебесін ескере отырып, Қорғаныс министрлігінің басшылығы «SARBAZ+» жобасын осы жерден бастауды ұйғарды. Жоба сарбаздарды даярлаудың тиімді әрі түсінікті жүйесін қалыптастыруға бағытталған. Басты жаңашылдық - жастар мерзімді әскери қызметке myarmy.kz цифрлық платформасы арқылы іріктелді. 268 үміткердің 90-ы таңдалды. 

Дархан Ахмедиев, ҚР Қорғаныс министрінің орынбасары:

- Біздің офицерлер мен курсанттар арнайы курстардан өтті. Ол - сарбаздармен тіл табысу курстары. Жаңа форматтағы көшбасшылық курстарды өтті. Одан бөлек кабинет психологиялық салмақ бар.

Сарбаздар әскери билетпен қатар бірқатар дағдыларды да алып қайтады. Мұнда радиобайланыс, желілік технологиялар және ұшқышсыз ұшу аппараттарын басқару саласындағы мамандарды даярлайтын оқу сыныптары ашылды. Astana Hub-пен бірлесіп TechOrda бағдарламасы бойынша оқыту ұйымдастырылған. Олар ақпараттық қауіпсіздік, деректерді қорғау және жасанды интеллект технологияларын қолдана отырып дрондарды бағдарламалауды меңгереді. Ағылшын тілін онлай-үйренеді.

Дархан Ахмедиев, ҚР Қорғаныс министрінің орынбасары:

- Бұдан бөлек қауіпсіздік - жаңағы ақылды интеллекті қосып видеоаналитиканы қостық. Өзіңіз көрдіңіздер жаңағы компания көрсетті осындағы барлық камераны бір жүйеге кіргізіп осы әскери бөлімшеде не болып жатқанын бір экрнаннан көре алады. Ол ақпарат осы әскери бөлімшенің басшысына шығып отыр және штаб басшысына шығып отыр.

«SARBAZ+» жобасы аясында жеке құрамның психологиялық жай-күйіне де айрықша мән берілген. Мерзімді әскери қызметшілерге ауқымды фитнес-бағдарлама ұсынылады. Футбол алаңы қайта жөнделіп, streetball және workout жаттығуларына арналған алаңдар жабдықталды, заманауи спорт залы ашылды. Казармаларда демалыс бөлмелері қайта жасақталды. Тіпті бейнеойын ойнауға болады. Министр орынбасары Дархан Ахмедиевтің айтуынша, алдағы уақытта «SARBAZ+» жобасын кеңейту жоспарланып отыр. Ол Қазақстанның тағы бірнеше әскери бөліміне енгізіледі.

Авторлары: Аршын Кемелжан, Григорий Беденко, Мұхит Құдықбаев