Дрондар мен киберқауіпсіздікке басымдық: Қазақстан армиясында SARBAZ+ жобасы іске қосылды

Қазақстан Республикасының Қарулы Күштерінде мерзімді әскери қызметтің жаңартылған форматы – «SARBAZ+» жобасы жүзеге асырылуда. Бұл бастама цифрлық дағдыларды дамытуға, адами капиталды күшейтуге және әскери қызметшілердің қауіпсіздігін арттыруға бағытталған.

Пилоттық жоба Алматы облысындағы 78460 әскери бөлімінде іске қосылды. «SARBAZ+» мерзімді әскери қызметтің мазмұнын қайта қарастырып, сарбаздарды даярлаудың саналы әрі дамуға бағытталған жаңа моделін ұсынады.

Жобадағы басты жаңалықтардың бірі – myarmy.kz платформасы арқылы конкурстық іріктеу жүйесінің енгізілуі. Пилоттық кезеңде 268 өтінім қабылданып, олардың ішінен 90 үміткер таңдап алынды. Жас сарбаздар әскери антты туған-туыстарының қатысуымен қабылдады. Қазіргі таңда жоба толық іске асырылып, оны басқа бөлімдерге кеңейту жоспарланып отыр.

Күзгі әскерге шақыру аясында Eltex, Rtel және Ashyk Aspan компанияларының қатысуымен радиобайланыс, желілік технологиялар және ұшқышсыз ұшу аппараттарын басқару бағыттары бойынша оқу сыныптары ашылды. Astana Hub-пен бірлескен TechOrda бағдарламасы шеңберінде ақпараттық қауіпсіздік, деректерді қорғау және жасанды интеллект көмегімен дрондарды бағдарламалау бойынша оқыту жүргізілуде. Сонымен қатар әскери қызметшілер QLANG платформасы арқылы ағылшын тілін онлайн меңгеруде.

Жауынгерлік дайындықты күшейту мақсатында заманауи электронды тир іске қосылды. Спорттық инфрақұрылым жаңартылып, футбол алаңы жөнделді, streetball пен workout алаңдары салынды, жаңа жаттығу залы ашылды.

Қауіпсіздікті арттыру үшін бейнеаналитикаға негізделген автоматтандырылған мониторинг жүйесі енгізілді. Интеллектуалдық және психологиялық дамуға арналған шахмат секциялары жұмыс істейді, патриоттық бағыттағы әдебиеттер мен фильмдер тізімі әзірленді, психологиялық демалыс бөлмелері ашылды.

Сонымен қатар офицерлер мен сержанттар үшін көшбасшылық қабілеттерді дамытуға бағытталған курстар ұйымдастырылуда. Командирлер жеке құрамның тәртібімен қатар моральдық-психологиялық жағдайына да жауапты.

«SARBAZ+» жобасы мерзімді әскери қызметті бір жылдық тұлғалық даму мен практикалық дағдыларды игеру кезеңіне айналдыруды көздейді. Бұл бастама армияның беделін арттырып, қоғамның Қарулы Күштерге деген сенімін нығайтуға бағытталған.