Астанада тазалықты бақылау күшейтілді: дрондар мен камералар іске қосылды

Ведомствоның дерегінше, қоғамдық орындарды ластау фактілерінің алдын алу және жолын кесу бағытында түсіндіру жұмыстары жүргізіліп, құқық бұзушыларға қатысты әкімшілік шаралар қабылдануда.

Айта кетейік, белгіленбеген орындарға қоқыс тастау, темекі тұқылын лақтыру, жерге түкіру, сондай-ақ көлік терезесінен қоқыс лақтыру әрекеттері үшін заңнамада әкімшілік жауапкершілік көзделген.

Аталған жұмыс «Таза Қазақстан» экологиялық акциясы аясында тұрақты түрде жүргізілуде. Жыл басынан бері қоғамдық орындарды ластау және абаттандыру ережелерін бұзу бойынша шамамен 16 мың дерек тіркелген.

Құқық бұзушылықтарды анықтау үшін Оперативті басқару орталығының бейнекамераларымен қатар дрондар да қолданылып жатыр. Олар құқық бұзушылықтарды тіркеп, патрульдік қызметтерге жедел ақпарат береді.

Сонымен бірге дрондар арқылы азаматтарға қоғамдық тазалықты сақтау, қала мүлкіне ұқыпты қарау және қоғамдық тәртіпті сақтау туралы дыбыстық ескертулер жасалады.

Полиция қала тұрғындары мен қонақтарын жауапкершілік танытуға шақырып, тазалық мәдениетін қалыптастыру әр азаматтың міндеті екенін атап өтті.

Айта кетейік, Павлодар ормандарында өртке қарсы бақылауға дрондар жұмылдырылды.