Семейде оқушылар бірін бірі пышақтап тастады

АСТАНА, 15 тамыз – Sputnik. Семейдегі №52 мектептің 13 жастағы екі оқушысы бірін-бірі пышақтап тастады, деп хабарлайды Sputnik Қазақстан.

Екеуі де бір-біріне пышақ салған, бірінің денесінде 15 пышақ жарақаты болған. Сыныптас оқушылар дос болып, тіпті күреспен де бірге айналысқан. Екеуі 9 сыныпта оқиды. Қайғылы жағдай сабақтан тыс уақытта болған.

БАҚ беттерінде қан-жоса болған бала туысының көршісінің үйіне өз аяғымен барғаны жазылып жатыр. Екі оқушының бірі үйінде, екіншісі ауруханада ем алып жатыр. Оған 4 сағат ота жасалған. Үш күн жансақтау бөлімінде жатып, қазір жалпы палатаға ауыстырылған. Жағдайы тұрақты, дейді дәрігерлер.

"10 қыркүйекте екі пациент тексеру және қажетті медициналық көмек көрсету үшін Абай облысының медициналық мекемесіне жеткізілді. Науқастардың бірі ауруханаға жатқызылды. Қазіргі уақытта оның жағдайы тұрақты, қажетті медициналық көмек толық көлемде көрсетіліп жатыр. Тексеруден кейін екінші науқас дәрігерлердің тиісті ұсыныстарымен амбулаториялық емделуге жіберілді", - дейді Абай облысының денсаулық сақтау басқармасында.

Абай облыстық полиция департаменті қылмыстық іс қозғады.

"10 қыркүйек күні полицияға дене жарақаттарымен екі адамның ауруханаға жатқызылғаны туралы хабарлама түскен. Осы факті бойынша сотқа дейінгі тергеп-тексеру жүргізіліп жатыр. Оның барысында болған оқиғаның барлық мән-жайы анықталады", - дейді полицияда.

Тергеу қорытындысы бойынша кәмелетке толмағандарды профилактикалық есепке қою, сондай-ақ олардың заңды өкілдерін балаларды тәрбиелеу жөніндегі міндеттерін тиісінше орындамағаны үшін жауапкершілікке тарту мәселесі қаралады.

Түпкілікті процестік шешім тергеу нәтижелері бойынша қабылданады, дейді облыстық полиция департаментінде.