Семейде оқушылар жұмысшы мамандықтарды меңгеріп жүр

Qazaq24.com, 24.KZ дереккөзінен алынған мәліметтерге сүйене отырып мәлімдеме жасады..

Семейлік оқушылар колледждер мен кәсіпорындарға барып жұмысшы мамандықтарымен танысты. Мұндай тәжірибе жасөспірімдердің кәсіби бағыт-бағдарын айқындауға зор мүмкіндік береді. Өңірде қолға алынған жоба аясына бес мың оқушы қамтылады деп жоспарланған.

11 сынып оқушысы Заңғар Рауанұлы инженер-конструктор болуды армандайды. Қазір жоба аясында жеңіл көліктерді жөндеудің қыр-сырын үйреніп жүр.

Заңғар Рауанұлы, оқушы:

- Қызыққан мамандығым ол жеңіл автомобильдерді ремонттау. Біз мұнда моторларды шашып, қай жері дұрыс емес екенін тауып соларды жөндеп жатырмыз. Мен осында түскен себебім, өзіме арнайы тәжірибе жинай аламын және керекті білімді ала аламын.

Заңғарға бағыт-бағдар беріп жүрген тәлімгер осы колледждің түлегі Никита Бугров. Қазір ол отын жүйесін жөндеу механигі. Тәжірибесін бөлісуден жалықпайды.

Никита Бугров , жөндеу механигі:

- Бәрін көрсетеміз, машина келетін кезде нақты түсіндіреміз. Қалай нені шешу керек. Бірінші клапонный крышкасын шешеміз. Содан кейін станокқа қоятын кезде допуск қанша болу керегін көрсетеміз. Соның бәрін түсіндіреміз.

Тәжірибелік сабақтар оқушылардың кәсіби білімін нығайтып қана қоймай, еңбекке деген қызығушылығын арттырады. «Колледж бен кәсіпорын арасындағы әріптестік маман даярлаудың тиімді үлгісі», - дейді ұйымдастырушылар.

Олег Васильев, Көлік колледжі директорының оқу-өндірістік жұмысы жөніндегі орынбасары:
- Біз әлеуметтік серіктестерімізбен бірлесе жұмыс істейміз. Мұның бәрі білікті маман даярлау үшін жасалады. Кәсіпорынға білікті мамандар қажет, ал студенттерге тәжірибеден өтуге арналған жақсы база керек. Яғни осы бағытта біз заманауи технологиялық жабдықтарды көріп, қолданып отырмыз.

Андрей Резников, өндірістік компания директорының орынбасары:
- Біз студенттерді үйретіп, кәсібіне деген қызығушылықты арттыруға тырысамыз. Олардың маман боп өсуіне және келешекте еңбек нарығында сұранысқа ие болуына үлес қосқымыз келеді.

Мамандардың айтуынша, жөндеу шеберлерінің еңбекақысы 500 мың теңгеден басталып бірнеше миллионға жетеді. «Сондықтан жұмысшы мамандыққа қызығушылық танытатындардың қатары жылдан жылға артып келеді», - дейді олар.

Авторлары: Рүстем Қайратұлы, Медет Өмірханов

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.