Алматыда студенттер мен оқушылар Қаржы сақшысы интерактивті ойынын меңгеріп жүр

Алматыдағы колледж студенттері мен мектептердің 10-11 сынып оқушылары «Қаржы сақшысы» интерактивті ойынын меңгеруде. 

Мұндағы мақсат балалардың қаржылық сауаттын арттыру. «Заң және тәртіп» тұжырымдамасы аясында жүзеге асқан жобаны Оқу-ағарту министрлігінің қолдауымен AML Academy және Қаржылық мониторинг агенттігі әзірлеген.

Жасөспірімдер фишинг, телефон арқылы алдау, қаржы пирамидалары және дропперлік сияқты қауіптерге жиі тап болады. Мұндай алаяқтық әрекеттерден сақтану үшін сала қызметкерлерімен кездесулер ұйымдастыру аздық етеді. Қауіпті дер кезінде сезіп, қорғану үшін жастар белсенді қолданатын интерактивті құралдардың көмегі зор, дейді мамандар.

Жақсылық Мырзахан, Алматы қ. экономикалық тергеп тексеру департаментінің өкілі:

- Оқушылар сыртта да егер сондай ұсыныстар түсіп жатқан болса соған қарсы тұрады деген ойдамыз. Алаяқтық схемасынан хабары болады. Бағанағы айтылған фишинг дейді, дропперство дейді, терминдер арқылы олар көп нәрсені түсінбеуі мүмкін. Ал ойын арқылы алаяқтықтардың бәрін біліп жанындағы достарына да айта жүреді.

«Qarzhy Saqshysy» ойыны шағын-кейстер және алаяқтық жоспарға негізделген сұрақтардан тұрады. Жүйе бірнеше нұсқа ұсынады. Ал ойыншы ең қауіпсіз және тиімді жолды таңдауы тиіс. Бұл дереккөздерді тексеру, күдікті сұрақтарға мән беру және ғаламтордағы қауіпті әрекеттерден аулақ болуға үйретеді.

Жанель Амандос, 10-сынып оқушысы:

- Осы ойында көптеген кейіпкерлер болды. Көбінесе олар алаяқтар. Мен бұл алаяқтарға сеніп қалған жоқпын. Ұтылған жоқпын. Себебі қазіргі кезде осы өзекті мәселе көп жерлерде айтылып жатыр. Бізге ата-анамыз да үйде айтады, мұғалімдер де мектепте айтып жатады. Сондықтан алданып қалған жоқпын.

Алдағы уақытта «Qarzhy Saqshysy» ойыны барлық қала мектептері мен колледждерін қамтиды. Ойында жақсы нәтиже көрсеткен оқушылар арнайы сыйлықтармен марапатталып, сертификаттарға ие болады.

Гүлжан Көленқызы, Валентин Лобанов