​Семейде қоқыс контейнерінен жаңа туған баланың денесі табылды: Полиция күдіктілерді анықтады

Семей қаласының сол жағалауындағы қоқыс жәшіктерінің бірінен жаңа туған нәрестенің денесі табылды. Абай облыстық Полиция департаменті аталған дерекке қатысты ресми ақпарат берді.

Қайғылы жағдай туралы хабарлама 3 ақпан күні Әуезов атындағы полиция бөлімінің кезекші бөліміне келіп түскен. Оқиға орнына шұғыл түрде жеткен жедел-тергеу тобы тексеру жұмыстарын бастады.

Жедел іздестіру шаралары барысында полиция қызметкерлері 20 жастағы қала тұрғынын анықтады. Бойжеткеннің айтуынша, ол үйде босанған және нәресте өлі туылған. 

Сондай-ақ, тергеу барысында сәбидің денесін қоқысқа апарып тастаған қала тұрғыны да анықталды.

Қазіргі уақытта нәрестенің денесі сот-медициналық сараптамаға жіберілді. Сараптама қорытындысы бойынша процессуалдық шешім қабылданып, оқиғаға қатысы бар барлық тұлғалардың әрекетіне құқықтық баға беріледі.

Бүгін, 14:53