Сенатор: браконьерлік деректері көбейіп барады

Оның айтуынша, су айдындарының едәуір бөлігі әлі де иесіз жатыр, бірқатар өңірде су нысандарының өзекті тізімі жоқ, ал уәкілетті органдар тарапынан бақылау өте төмен. Осының салдарынан браконьерлік деректер жиілеп, ресми статистика мен тексеру мәліметтері сәйкес келмей жатыр, сондай-ақ балық түрлерінің қоры азайып барады.

Бұдан бөлек, сауалда өнімді белгіленген квотадан тыс экспорттау, заңсыз ауланған балықты акваөсіру өнімі ретінде заңдастыру, құжаттарды қолдан жасау және қайталап пайдалану жағдайлары атап өтілді. Мұнымен қоса, бюджет қаражатының тиімсіз игерілуі мен салалық бағдарламалардың орындалуындағы кедергілер де сөз болды.

- Комитеттің 2022-2025 жылдардағы ресми деректері бойынша 84 мың тонна балық заңсыз айналымнан тәркіленді. Ғылыми зерттеулердің нәтижелері балық түрлері қорларының тұрақты түрде төмендеп бара жатқанын көрсетті. Бірқатар аймақтарда браконьерлік әрекеттен келген залал айтарлықтай мөлшерге жетіп жатыр, - деді Андрей Лукин Сенаттың жалпы отырысында.

Осыған байланысты сенатор су айдындарын толықтай жауапты тұлғаларға бекітіп беруді, бақылауды күшейтіп, мониторингтің цифрлық құралдарын енгізуді ұсынды. Атап айтқанда, «E-Fish» жүйесін толыққанды іске қосуды, сондай-ақ браконьерлік пен құжатты қолдан жасағаны үшін жауапкершілікті қатаңдатуды сұрады.

Сонымен қатар экспортты нақты ауланған балық көлеміне қатаң сәйкестендіре отырып шектеу, субсидиялаудың ашықтығын арттыру және мемлекеттік қолдау тәсілдерін қайта қарау ұсынылды.

Айта кетейік, Атырауда өткен жылы браконьерлерге 31,7 млн теңге айыппұл салынды.