Сенатор Жол қозғалысы ережелерін қатаңдатуды және тәртіпті жүргізушілерді ынталандыруды ұсынды

Қожаев бұл ұсынысын премьер-министрге жолдаған депутаттық сауалында көтерді. Оның айтуынша, мұндай бастамаға жол-көлік оқиғаларында орын алған қайғылы жағдайлар себеп болған.

"Соның салдарынан жастар қаза тапты. Олардың өмірі адамның өзіне деген шамадан тыс сенімділігі, жол қозғалысы ережелерін әдейі елемеуі және азаматтардың қауіпсіздігіне немқұрайлы қарауы салдарынан қиылды. Әсіресе бұл мәселе ірі қалаларда өте өзекті. Мұнда агрессивті жүргізу, жылдамдықты асыру, түнгі жарыстар және жол қауіпсіздігі талаптарын бұзу жиі кездеседі. Өткен жылы біз депутаттық сауалда ЖҚЕ-ні жүйелі түрде бұзғандар үшін жауапкершілікті күшейту қажеттігін көтерген едік. Үкімет бұл ұстанымды қолдап, бір жыл ішінде 10 және одан да көп құқық бұзушылық жасаған жүргізушілерді ЖҚЕ бойынша білімін қайта тексеруге жіберу, емтихан тапсырғанға дейін көлік басқару құқығын тоқтату, сондай-ақ осындай жүргізушілер үшін айыппұлға 50 пайыздық жеңілдікті алып тастау сияқты түзетулер әзірленіп жатқанын хабарлаған болатын", – деді сенатор.

Оның айтуынша, жылдамдықты тіркеу тетіктерін де жетілдіру қажет.

"Қазіргі кезде негізінен көлік жылдамдығы белгілі бір нүктеде ғана тіркеледі. Жүргізушілер камераға жақындағанда жылдамдықты уақытша төмендетіп, кейін қайта арттырады. Осылайша олар ережені сақтауды емес, бақылау жүйесін айналып өтуді үйренген. Ал ЖҚЕ бойынша белгіленген жылдамдық жолдың тек бір нүктесінде емес, бүкіл учаскесінде сақталуы тиіс. Сондықтан қазіргі тәсіл қажетті профилактикалық әсер бермейді. Бұған дейін заңнамалық деңгейде орташа жылдамдықты бақылау жүйесі енгізілген болатын. Бұл жүйе жолдың белгілі бір бөлігінде көліктің орташа жылдамдығын есептеп, нақты жылдамдық режимінің сақталуын анықтайды", – деді Қожаев.

Ол мұндай тәсілді енді елді мекендерде де енгізу қажет деп санайды. Сонымен қатар, ЖҚЕ-ні жүйелі түрде бұзатындарға қатысты жауапкершілікті кезең-кезеңімен күшейтетін кешенді жүйе құруды ұсынды.

"Мұндай модельде жеңілдететін тетіктерді алып тастау қарастырылуы тиіс. Атап айтқанда, айыппұлды жеңілдікпен төлеуді жою, жүргізушіні ЖҚЕ бойынша қайта емтихан тапсырғанға дейін көлік жүргізу құқығын шектеу, қайталанған құқық бұзушылықтар үшін жүргізуші куәлігін ұзақ мерзімге айыру, сондай-ақ өрескел және әдейі қауіпті ереже бұзған жағдайда әкімшілік қамау қолдану қажет. Бұл жүйенің тиімділігі үшін құқық бұзушылықтардың "жүйелілігін" нақты анықтайтын өлшемдер және оларды автоматты түрде анықтайтын механизм болуы тиіс", – деді депутат.

Сонымен қатар, ол жауапкершілік шараларымен қатар, заңға бағынатын жүргізушілерді ынталандыру да маңызды екенін атап өтті.

"ЖҚЕ-ні бұзбайтын жүргізушілерді ынталандыру жүйесін енгізуді қарастыру қажет деп санаймыз. Оған міндетті сақтандыру құнын төмендету, түрлі сервистік қызметтерде жеңілдіктер беру және қауіпсіз жүргізу мәдениетін қалыптастыруға бағытталған басқа да шаралар кіруі мүмкін", – деп қорытындылады Марат Қожаев.

Бұған дейін Алматыға өңірлерден полиция күштері тартылғанын жазғанбыз.