Сенімді диалогтің ықпалы зор

Сенат төрағасы Мәулен Әшімбаев Палестинаның Жоғарғы судьясы, Палестина Президентінің дін істері жөніндегі кеңесшісі Доктор Махмұд Седки Әл-Хаббашпен кездесті. Тараптар халықаралық ұйымдар шеңберінде екі ел арасындағы ынтымақтастықты нығайту мәселелерін талқылады және Газа секторындағы гуманитарлық ахуал жөнінде пікір алмасты.

Палата спикері мейманға ілтипат білдіріп, Қазақстан Палестинаны араб әлеміндегі маңызды серіктестердің бірі ретінде қарастыратынын және екі ел арасында түрлі саладағы қатынастарды дамытуға мүд­делі екенін атап өтті. Кездесу­де екіжақты достық қарым-қатынас­тар­ды нығайтуға жоғары деңгей­дегі белсенді және сенімді диалогтің ықпалы зор екені де сөз болды.

«Бүгінде екі ел арасында сая­си диалог жоғары деңгейде жалғасып келеді. Палестина Президенті Махмұд Аббастың 2022 жылы Астанада өткен Азиядағы өзара іс-қимыл және сенім шаралары жөніндегі кеңестің VI саммитіне қаты­суы – соның айқын дәлелі. Саммит аясында Қазақстан Прези­денті Қасым-Жомарт Тоқаев Палестина Президентімен кездескенін ерекше атап өт­кен жөн. Бұл келіссөздер екі ел арасындағы өзара түсіністік пен серіктестікті нығайту­ға маңызды серпін берді. Біз алдағы уақытта да сіздер­дің елдеріңізбен түрлі сала­дағы ынтымақтастықты дамытуға мүдделіміз әрі Палестинаны нығайтуға бағытталған бастамаларды әрдайым қолдаймыз», деді М.Әшімбаев.

Сонымен қатар Сенат төрағасы Газа секторындағы бұрын-соңды болмаған гума­нитарлық ахуалға алаң­дау­шылық білдірді. Ол бейбіт тұр­ғындардың зардап шегуі қабырғаны қайыс­тыратынын айтып, жанжалды дипломатиялық жолмен шешудің маңызды екенін тілге тиек етті.

«Қазақстан Біріккен Ұлттар Ұйымының тиісті қарарларына сәйкес, Палестина халқының заңды құқықтарын, сондай-ақ «екі халық үшін екі мемлекет» қағидатын дәйекті түрде қолдайды. Қазақстан Президенті Қасым-Жомарт Тоқаев атап өткендей, жанжалды дипломатиялық жолмен шешу – тұрақты бейбітшілік пен қауіпсіздікке қол жеткізудің жалғыз жолы. Біздің басты қағидатымыз – гуманитарлық көмектің қауіпсіз, үздіксіз, шартсыз қолжетімді болуы, азаматтардың қорғалуы және инфрақұрылымның қалпына келтірілуі», деп М.Әшімбаев екі елдің Азық-түлік қауіпсіздігі жөніндегі Ислам ұйымы, Ислам Ынты­мақтастығы Ұйымы және басқа да институттар мен халық­аралық ұйымдар аясындағы өзара іс-қимылдың басым бағыт­тарына назар аударды.

Сондай-ақ тараптар Әлемдік және дәстүрлі дін­дер көшбас­шыларының съезі шеңберіндегі бірлескен жұмысты талқылап, қақтығыс­тарды бейбіт жолмен шешудің және рухани дипломатияны дамытудың маңызы жөнінде сұхбат құрды.