Саңлақтар сенімді ақтады

Жапонияның Токио қаласында XXV жазғы Сурдлимпиада ойындары басталды. Дүбірі төрткүл дүниені кернеген аламанда саңлақтарымыз алғашқы күндерден-ақ алтын медаль көсіп алып, мерейімізді тасытты. Қанжығамызда – төрт алтын медаль бар!

Әлқисса, өткен сенбіде төрт жылда бір рет өтетін есту қабілеті зақымданған спорт­шылардың додасы салтанатты түрде ашылды. Еліміздің деле­гациясын XXIV жазғы Сурдлим­пиаданың жүлде­герлері Айдос Түгелбаев пен Анна Краморова бастап, Көк туымызды желбірете көтеріп шықты. Токио Метро­политен гимназиясында өткен салтанатты іс-шарадан кейін Сурдлимпиадаға қатысушы 81 елден келген 3 мыңға жуық спорт­шы тартысты бастап кетті. Ел үмітін арқалап барған 78 саң­лағымыз 8 спорт түрінен додаға қосылады.

Аламанның алғашқы жарыс күндерінде жеңіл атлет Фаина Мейірманова биіктікке секіруде алдына қара салған жоқ. 19 жас­­тағы саңлағымыз 1.79 метр нә­тижемен Сурдлимпиаданың чем­пионы атанып қана қоймай, рекордты да жаңартты. Күміс медаль 1.76 метр нәтижені қанағат тұтқан бейтарап спортшы Анна Суравецке бұйырды. Қола медаль 1.67 метр биіктікті еңсерген словакиялық Глонарик Лейаның қанжығасына бөктерілді.

Ел қоржынына алтын медальды еселеп салған сурдо дзю­дошылардың да еңбегі ерен. Хамза Ғұлама 66 кг сал­мақ дә­­режесінде татамиге шықты. Іріктеу кезеңдерінде қар­сы­ластарын тулақша илеген жерлесіміз ширек финалдық белдесуде өте тәжірибелі жапон балуаны Сатоны сан соқтырды. Жартылай финалдық тартыста неміс спортшысы Шеллерді шідерледі де, алтын медаль үшін күресте алжирлік Бухиделді жық­ты. Бұл 17 жастағы Хамзаның бұл алғашқы асуы. 

73 кг салмақ дәрежесінде белдескен Шадияр Қуандық Ширек финалдық белдесуде түрік Иыл­дызды еңсерсе, жартылай финалда Иран спортшысы Дафтариді сүріндірді. Ал алтын медаль үшін тартыста оңтүстіккореялық Хванг Хёнді айқын жеңді. 

Еркебұлан Қанафин де Сурд­лимпиада чемпионы атанды. 81 кг салмақ дәрежесінде белдес­кен саңлақ финалдық тартыста мажарлық Патрик Отвошты ай­қын жығып, мықтылығын көрсетті.

Токио төрінде өтіп жатқан Сурдлимпиада аламаны 26 қара­шада аяқталады.