Шәпкенов Атырауды масаға қарсы күрес жұмыстарының сапасын сынға алды

Облыс әкімі Серік Шәпкеновтің төрағалығымен өткен кеңесте масаға қарсы жүргізіліп жатқан дезинсекция шаралары талқыланды. 

Жиынға тұрғындардың улау жұмыстарының тиімділігіне байланысты көп шағым түсуі себеп болды. Қазіргі таңда жоспарланған жұмыстың небәрі 40 пайызы орындалғанымен, жыл басынан бері «109» байланыс орталығына екі мыңнан астам өтініш келіп түскен.

Шағымдардың басым бөлігі Еркінқала ауылдық округінен және Өркен, Жұмыскер, Жұлдыз, Нұрсая шағынаудандарынан түскен. Бұл бағыттағы жұмыстар туралы «AG Disinfection Services» ЖШС директоры Нұрлыбек Ахмедияров баяндады. Оның айтуынша, дезинсекция негізінен ашық су айдындарында, әсіресе «Тұзды сай» аумағында жүргізілуде. Ұшқышсыз аппараттар арқылы 30 рет әуеден улау жасалып, әр рейсте 30 литрден арнайы препарат қолданылған. Сонымен қатар арналарды өңдеуге арнайы техникалар тартылып, кешкі уақытта көшелер мен қоғамдық орындарды улауға он автокөлік шығару жоспарланған.

Биыл Атырау қаласында дезинсекцияға 101 млн теңге бөлініп, «Агран», «Мистраль», «Фаскон», «Сольфак», «Циперметрин» препараттары қолданылуда. Мердігер ұйым олардың адамдар мен жануарларға зиянсыз екенін мәлімдеді. Жұмыстар күн сайын сағат 21:00-ден таңғы 06:00-ге дейін жүргізіледі.

Әкім шаралардың жүйелі ұйымдастырылмағанын сынға алып, жауапты басшыларға қатаң ескерту жасады. Ол қысқа мерзімде дезинсекцияны күшейтіп, су айдындарына жақын аумақтарды толық қамтуды тапсырды. Сонымен қатар санитариялық-эпидемиологиялық бақылау департаментіне мердігер ұйымның лицензиялары, техникалық жабдықталуы, ерітінді дайындау технологиясы және қолданылатын препарат мөлшерінің талапқа сәйкестігін тексеру міндеттелді.

Серік Шәпкенов дезинсекцияның нақты кестесін бекітіп, оның қатаң сақталуын қамтамасыз етуді, қажет болған жағдайда қосымша мердігерлерді тартып, жұмыс қарқынын жеделдетуді тапсырды. Ең бастысы — жұмыстар ашық жүргізіліп, тұрғындар қай аумақтың қай уақытта уланатынын алдын ала білуі тиіс.

Бүгін, 12:16