Шарбақты ауданында жаңа Конституцияның практикалық маңызы талқыланды

Павлодар облысының Шарбақты ауданына «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері сапармен барды. Тұрғындармен диалог аумақтың экономикалық және әлеуметтік тұрақтылығы қалыптасатын негізгі алаңдарда – өндірістік кәсіпорындарда, ауыл шаруашылығы ұйымдарында және аудандық мәдениет үйінде өтті, - деп хабарлайды Aikyn.kz.

Конституциялық реформаның отандық өндірісті дамытудағы, әлеуметтік саясатты нығайтудағы және халықтың өмір сапасын арттырудағы практикалық маңызы кездесулердің басты тақырыбы болды. Алғашқы кездесу Орловка ауылындағы «Победа» ЖШС ұжымымен өтті. Қатысушылар жаңа Ата Заңның бизнес дамуына тұрақты жағдай қалыптастырудағы және аграрлық салада ұзақмерзімді жоспарлауды қамтамасыз етудегі рөлі туралы пікір алмасты.

Кездесуге қатысушылар Конституцияда отандық кәсіпкерлікті қолдау және инвестицияларды қорғау кепілдіктерінің бекітілуі ауыл экономикасының тұрақты дамуына негіз қалыптастырып, кәсіпорындардың өз қызметін ұзақ мерзімге сенімді жоспарлауына мүмкіндік беретінін атап өтті.

«Ірі өндірісті қысқа мерзімді шешімдермен дамыту мүмкін емес – оған ұзақмерзімді стратегия мен болашаққа сенім қажет. Ата Заң жұмыстың түсінікті әрі тұрақты шарттарын қамтамасыз етуге тиіс: инвестицияларды қорғау, отандық бизнесті қолдау және мемлекеттің әлеуметтік жауапкершілігін айқындау. Осындай жағдайда ғана аудан экономикасы тұрақты әрі жүйелі өсімге қол жеткізе алады», – деді Сенат депутаты, коалиция мүшесі Алтынбек Нухұлы.

Диалог аудандық мәдениет үйінде жалғасты. Мұнда шешім қабылдау үдерісіне азаматтардың қатысуы, жергілікті өзін-өзі басқаруды дамыту және қоғамдық бақылауды күшейту мәселелеріне ерекше назар аударылды. Кездесуге қатысушылар тұрғындардың белсенділігі мен азаматтық ұстанымы өңірдің даму қарқыны мен сапасына тікелей әсер ететінін атап өтті.

Шарбақты ауылында коалиция мүшелері дәнді дақылдар мен күнбағыс өсіруге маманданған «НИКРОМ» ЖШС ұжымымен кездесті. Әңгіме барысында ауыл шаруашылығы өндірушілерінің өнімдерін нарыққа шығару мүмкіндіктері, аграрлық секторды мемлекеттік қолдау шаралары және агробизнесті жүргізудің ашық әрі түсінікті ережелерін қалыптастыру мәселелері талқыланды.

Кездесулер өңірдегі бірегей табиғи кешен – «Ертіс орманы» мемлекеттік табиғи орман резерватында қорытындыланды. Мұнда конституциялық реформаның экологиялық бағыты және табиғи мұраны сақтау арқылы аумақтардың орнықты дамуын қамтамасыз етудің маңызы сөз болды.

Қатысушылар экологиялық қағидаттардың Ата Заң деңгейінде бекітілуі өңірлерді дамытудың заманауи тәсілін қалыптастыратынын атап өтті. Бұл тәсіл экономикалық өсімді қоршаған ортаға жауапкершілікпен қараумен ұштастыруды көздейді.

«Экономикалық өсім мен экологиялық қауіпсіздік бір-біріне қайшы келмеуі керек. Өнеркәсіп, ауыл шаруашылығы және табиғатты қорғау арасындағы тепе-теңдік – өңірді дамытудың заманауи моделі», – деді коалиция мүшесі Евгений Миронов.

Кездесулер қорытындысы бойынша қатысушылар конституциялық реформа экономика, экология және азаматтардың белсенді қатысуы негізгі рөл атқаратын теңгерімді даму моделін қалыптастыруға бағытталғанын атап өтті.