Шархан Қазығұлдың Таңдамалы шығармалар жинағы жарық көрді

Бүгін, 6 наурыз күні Астанадағы Ұлттық академиялық кітапхананың Конституция залында қазақ публицистикасында өзіндік қолтаңбасымен танылған белгілі жазушы-публицист, Қазақстанның еңбек сіңірген қайраткері Шархан Қазығұлдың «Таңдамалы шығармалар жинағы»  кітабының тұсаукесері болып өтті, деп хабарлайды Arasha.kz. 

«Әлем әйнегіндегі әсемдік», «Дүбәра дүние», «Тоғыз тарау туынды», «Оңашадағы онлайн ойлар», «Палитрасыз портреттер», «Футбол философиясының фрагменттері», «Шалахметов шеңбері», «Сегізінші нота» және тағы басқа публицистикалық кітаптарымен, сондай-ақ «Меценат» әдеби байқауының жеңімпазы атанған «Күлпет» атты романымен оқырманға жақсы таныс Шархан Қазығұлдың 70 жасқа толу мерейтойына орай шығарылған бұл таңдамалы шығармалар жинағына әр жылдары жазылған көркем шығармалары мен нон-фикшн жанрында жазылған публицистикалық дүниелері топтастырылған. Кітап жеті бөлімнен тұрады. Мұнда жазушының «Меценат.кз» әдеби сыйлығының тұңғыш лауреаты атанған «Күлпет» романы мен екі әңгімесі, кезінде оқырмандардан жоғары бағасын алған «Оңашадағы онлайн ойлар» туындысы, билік, әдебиет, өнер және журналистика саласындағы танымал тұлғалар туралы эсселері жинақталған. Тұлғалар образын ашуда өзіндік тың стилі қалыптасқан автордың жатық тілі мен жазу шеберлігі кітаптың мазмұны мен құрылымын аша түскен. Сонымен қатар таңдамалы жинақтан орын алған мөлтек портреттер мен «Футбол философиясының фрагменттері» туындысы да оқырман қызығушылығын тудыратыны анық.

Кітап таныстырылымын мемлекет және қоғам қайраткері Дархан Мыңбай жүргізіп отырды. Іс-шарада мемлекет және қоғам қайраткерлері мен жазушылар кітап туралы ойларымен бөлісті.