Шатдаун мұқтаждарға көмекті тоқтатты

АҚШ-тағы шатдаунның, яғни үкімет жұмысының ішнара тоқтағанына бүгін 21-күн. Конгресс осы айда 11 рет бюджетке қатысты ортақ шешімге келе алмады. Құжат бекуі үшін 50 сенатордың дауысы қажет. Алайда бұл жолы 50-ы қолдау білдірсе, 43-ы қарсы шыққан. 

Шатдаун одан әрі созылса, келесі айда 42 млн америкалық азық-түлік көмегінсіз қалуы мүмкін. Яғни демократтар мен республикашылар арасындағы текетірес Құрама Штаттардағы мұқтаж жандар, соның ішінде 13 млн баланы әлеуметтік көмектен қағуы ықтимал. Америкадағы ахуал туралы әріптесім Зайнұр Байжігіт баяндайды. 

АҚШ-тың әр сегізінші тұрғыны әлеуметтік көмекке мұқтаж. Ал шатдаун осы осал топтың жағдайын одан сайын нашарлататын түрі бар. Бюджет бекітілмегендіктен, атаулы әлеуметтік көмек резервттегі қордың ақшасы есебінен төленуде. Алайда миллиондаған америкалық бұл көмекті алатынын ескерсек, 6 млрд доллар алдағы екі аптада-ақ таусылуы мүмкін. Өйткені, бюджеттен әлеуметтік төлемге ай сайын 8 млрд доллар керек.

Али Хард, әлеуметтік бағдарламалар бойынша қауымдастық директоры:

- Осындай қиын-қыстау кезеңде тұрмысы нашар отбасылар күн көрудің түрлі амалын жасайды. Балалар қоспасы ұзаққа жетсін деп, кейбірі суды көбірек қосады. Ал бұл баланың өміріне қауіп төндіруі мүмкін. 

Осы айда федералдық мекеме қызметкерлеріне айлық әлі берілген жоқ. Көбі балаларының оқуын төлей алмай жүр. Тіпті күнделікті беретін ақшасын таппай дал.

Энтони Ли, ақысыз демалысқа жіберілген қызметкер:

- Екі студенттің әкесімін. Ұлымен оқуының ақысын төлей алмаймын деп ашық сөйлестім. Өйткені артық ақша жоқ. Ал бар мәселе Конгрессте болып тұр.

Билл Уайетт, Солт-Лейк-Сити әуежайлар департаментінің атқарушы директоры:

- Күнделікті қажет заттар жиынтығын береміз. Біз сондай-ақ  жанармай талонын таратамыз. Осылай ақысыз жұмыс істеп жүрген қызметкерлердің жағдайын жеңілдетуге күш салып жатырмыз. 

Шатдаун, яғни АҚШ-тағы саяси дағдарыс қай уақытқа дейін созылатыны белгісіз. Республикашылар медициналық сақтандыруға қатысты салықтық жеңілдіктерді алып тастамақшы. Бұл демократтардың наразылығын тудырды. Олардың айтуына қарағанда, бұл миллиондаған америкалықтың медициналық көмек алатын құқығын шектейді. Әзірге бұл текетіресте райынан қайтар ешкім жоқ. 

Майк Джонсон, АҚШ конгрессінің өкілі, республикашы:

- Демократтар саяси ойын ойнап отыр. Олар халықтың мүддесі үшін дұрыс шешім қабылдауға тиіс. 

Хаким Джеффрис, АҚШ конгрессінің өкілі, демократ:

- Республикашылардың денсаулық сақтау жүйесі бойынша жоспары қолдауға мүлде келмейді. Осы позициямызда қаламыз. Бір жыл бойы халықтың медициналық көмек алу құқығын қорғауға күш салып келдік. Ал республикашылар оны қысқартуға талпынып отыр.

Америкалықтардың еңбек нарығына деген сенімі де азая бастады. Ассошиэйтед пресс агенттігі жүргізген сауалнамаға қарағанда, халықтың 47 пайызы жұмыссыз қалса, екі қолға күрек таппаймыз ба деп қорқады. Ал 40 пайызы медициналық қызмет пен тұрғын үй ақысын төле алмай қиналып жүр. Үштен бірі жанармай бағасының өсуі олардың тұрмыс тіршілігіне әсер еткенін айтқан. Бюджет таяуда бекімесе, Конгресстегі текетірестің салдары ауыр болмақ. Федералдық қызметкерлер ғана емес, тұтастай Америка халқы зардап шегеді, - дейді сарапшылар. 

Авторы: Зайнұр Байжігіт