Шеберлер шайқасы адал еңбекті дәріптейді

Елімізде дуалды оқыту жүйесі мен тегін техникалық білім беру бағдарламаларына ерекше мән беріліп отыр. Бүгінде кәсіпорындарда 100 мыңнан  астам студент тағылымдамадан өтуде.

Оған қоса 4 мыңнан аса компания 600-ге тарта колледжді қамқорлығына алды. Мақсат – жұмысшы мамандығын таңдаған жастардың сапалы білім алуына жағдай жасау. Игі іске «Хабар» телеарнасы да үлес қосып отыр. «Жұмысшы мамандықтары» жылы аясында «Хабар» арнасы «Шеберлер шайқасы» деп аталатын реалити-шоу түсірді. 

«Шеберлер шайқасы» елімізде алғашқы кәсіби жұмысшыларға арналған жоба. Оның басты кейіпкерлері өнер жұлдыздары немесе елге танымал медиатұлғалар емес. Бұл жолы олардың орнын өкпек желдің өтінде жүрген еңбек адамдары басты. Олар қала тұрғызады. Жол салады. Жылу мен жарық тартады. Бастысы дастарханымызда күнделікті ыстық нанның болуы да осы жандардың тынымсыз еңбегі. Басты кейіпкерлер- дәнекерлеуші, құрылысшы, электрик, аспаз, өрт сөндірушілер.

Эльмира Жүнісова, «Шеберлер шайқасы» реалити-шоуының продюсері:

- Қарапайым еңбек адамдары деп қарайтын адамдар. Бірақ олардың әрқайсысы жұлдыз болуға лайықты деп ойлаймын. Әрқайсысы өз ісінің қаһарманы, өзінің мамандығын шын жүректен сүйетін және сол мамандығынан табыс тауып отбасын асырап отырған сондай керемет жандар.

Еңбеккерлердің арасында тігінші мамандығын игерген ер азаматты, дәнекерлеуші әйелді де кездестіруге болады. Мәселен, отыз алты жастағы Ғазиза Рысқұлова темірден түйін түйген шебер. Осы салада 20 жылдан бері жұмыс істеп келеді. Сайыста ерлерден кем түскен жоқ. Берілген тапсырманы аса дәлдікпен орындап шықты. Қазақстан-Қытай газ құбыры жобасы мен талай құрылыс нысандарында оның да қолтаңбасы бар.

Жалпы жобаға еліміздің әр түкпірінен мыңға тарта адамнан өтінім түскен. Соның 50-і елімізде бұрын-соңды болмаған реалити-шоуға жолдама алды. Барлығы 12 бағдарлама. Соның 10-ы автомеханик, шаруа, ағаш шебері сияқты 10 түрлі мамандыққа арналды. Олар үшін шеберхана, ферма, құрылыс алаңы, цех сияқты арнайы орындар жасалды. Қатысушылар сол жерде әдеттегідей жұмыс істеді. Мәселен, қой қырқып, кірпіш қалады. Ас пісірді.

Төлеген Нукутов, қоюшы режиссер:

- Жобаның да, менің де көздегенім жұмысшы мамандығын дәріптеу. Әсіресе  жастарға жақсы жұмысшының табысты, беделі жоғары болатынын көрсеткіміз, насихаттағымыз келді. Еңбектің қадірін түсіндіріп, кәсіпті дәріптесек жастар келмейді емес келеді деп ойлаймын.

Шоу әр сенбі сайын «Хабар» телеарнасынан эфирге шығады. Соңғы саны жыл соңына жоспарланған. Топтан оза шыққандары финалда өзара мықтыларын анықтайды. Нағыз еңбектің иесі бас жүлде 5 млн теңгені қанжығалайды.

Авторлары: Қарлығаш Қайыпбекова, Радик Жакупов