Қызметіне адал құтқарушы

Адам өмірін ажалдан арашалау – абыройлы міндет, жүректің қалауы.

Бұл петропавлдық өрт сөндіруші Мереке Кенжетаевтың қызметтік қағидасы. Ол Солтүстік Қазақстан облысында болған су тасқыны кезінде қауіпті аймақтарда жұмыс істеп, күндіз-түні бөгеттерді көтеруге атсалысты. 

Мереке Кенжетаевтың жұмысы осылай басталады. Ең алдымен өрт сөндіру техникаларын  қабылдап, кезекшілікке түскен қарауылдың дайындығын тексереді. Ол бұл салаға кездейсоқ келген жоқ. Төтенше жағдайлар қызметінде әжесінің інісі еңбек етіп, өрт кезінде ерлікпен қаза тапқан.

Мереке Кенжетаев, Қалалық №3 өрт сөндіру бөлімінің бөлімше командирі:

- Қызылорда облысында өрт кезінде қайтыс болды. Ол кісі өрт сөндіру бөлімінің басшысы болып жұмыс істеген. Бала кезден аңыз-әңгіме айтып, әжем патриот қылып өсірген. Сол себептен бала кезден болашақта өрт сөндіру маманы боламын деген ой қалыптасады.

Сол ойы орындалды. Мереке Отан алдындағы борышын өтеп келген соң, Петропавлдағы №3 өрт сөндіру бөліміне жұмысқа орналасты. Содан бері табан аудармай осында қызмет етіп, бөлімше командиріне дейін көтерілді. Әріптестері оны жауапты маман ретінде таниды.

Нұркен Мәжікеев, Қалалық №3 өрт сөндіру бөлімі бастығының орынбасары:

- Жауапкершілігі мол. Бөлімше командирі болғаннан кейін оған барлық жұмыстар тапсырылады. Барлық құтқару барысы, өрт сөндіруге барып жеткенде қарауыл, басқару барлығы Мерекенің мойнында болады.

Бөлімше командирі қызмет кезінде талай адамды өлімнен құтқарып қалды. Су тасқыны кезінде де күні – түні жұмыс істеп, қауіп – қатердің ортасында қалған халыққа алғашқылардың бірі болып көмекке келді. «Бұл шын мәнінде жүректің қалауы», - дейді Мереке.

Авторлары: Айдарбек Айтмұхамбетұлы, Қуаныш Қазбеков