Shell Қазақстандағы геологиялық барлау жобасына қаржы құяды

Қазақстан Республикасы Энергетика министрлігі мен «Shell Қазақстан» компаниясы Ақтөбе облысындағы «Жаңатұрмыс» учаскесінде геологиялық барлау жұмыстарын жүргізу туралы келісімге қол қойды.
Құжатқа ҚР Энергетика вице-министрі Ерлан Ақбаров пен «Shell» концернінің Қазақстандағы аға вице-президенті Сюзанн Куган қол қойды. Келісімшарт мерзімі 2032 жылға дейін белгіленген.

Жобаның мақсаты – елдің энергетикалық қауіпсіздігін нығайтып, көмірсутек қорын ұлғайту. Аумағы 1 377 шаршы шақырымды қамтитын учаскеде 3D сейсмикалық зерттеулер жүргізіліп, терең барлау ұңғымасын бұрғылау жоспарланған.

Жоба аясында «Shell» компаниясы өңірдің әлеуметтік-экономикалық дамуына кемінде 100 млн теңге бөледі. Қазіргі уақытта Қазақстанда көмірсутектерді барлау және өндіру бойынша 321 келісімшарт қолданыста.