Ширек ғасыр шекара шебінде

Qazaq24.com, Egemen.KZ дереккөзінен алынған ақпаратқа сүйене отырып жаңалық таратады..

Қазақ халқы ежелден атты ердің қанаты, батырдың сенімді серігі деп ерекше құрметтеген. Тарихта Қобыландының Тайбурылы, Алпамыстың Байшұбары, Қабанбайдың Қубасы мен Исатайдың Ақтабаны сынды тұлпарлардың ерлікке толы жорықтары туралы көптеген аңыздар сақталған. Ер қанаты саналған қазаққа қадірлі жануар бүгінгі күні де Жамбыл облысындағы 91678 әскери бөлім құрамында ел қауіпсіздігі жолында қызмет етіп келеді.

Аталған арнайы мақсаттағы таулы-егерлі полк қазіргі таңда ТМД елдері бойынша бірегей әскери құрылым саналады. Мұнда таулы аймақтарда қызмет атқаруға арнайы үйретілген аттар қолданылады. Әскери техника өте алмайтын қиын шатқалдар мен биік таулы жерлерде дәл осы аттар жеке құрамды тасымалдап, тапсырмалардың орындалуына мүмкіндік береді. Сонымен қатар олар оқ-дәрі, қару-жарақ және басқа да ауыр жүктерді жеткізуде маңызды рөл атқарады.

Адамдарды әскери қызметке қалай дайындаса, мұнда жылқылар да сондай дайындықтан өтеді. Әскери мамандардың айтуынша, бөлімге әкелінетін жылқылардың көпшілігі бастапқыда мүлде үйретілмеген, яғни салт мінуге дағдыланбаған әрі командаларды орындауға бейім емес болады. Сондықтан оқу ең қарапайым негіздерден басталады.

«Біздің бөлімдегі дайындық жүйелі түрде жүргізіледі. Алдымен әскери қызметші мен ат жеке-жеке дайындықтан өтеді. Кейін бөлімше, взвод және рота құрамында бірлескен іс-қимылдар пысықталады», дейді 91678 әскери бөлімінің таулы-егерлік ротасының командирі, капитан Елнұр Пернебек.

Әскери бөлім ширек ғасырдан астам тарихында түрлі кезеңді бастан өткерген. Бөлім 2000 жылы Қорғаныс министрінің директивасының негізінде Алматы облысының Жаркент қаласындағы 74261 әскери бөлімінің базасында таулы-егерлі батальон болып құрылған. Одан кейін Отар гарнизонында толықтай жасақталып, «Оңтүстік» өңірлік әскерлері қолбасшылығына қарасты 85395 әскери бөлімінің құрамына кіріп, Жуалы ауданына шоғырланады.

Ал 2007 жылы батальон 85395 әскери бөлімінің құрамынан шығып, «Оңтүстік» өңірлік әскерлері қолбасшылығына өтеді. 2013 жылы Қорғаныс министрінің шешіміне сәйкес батальон жеке таулы-егерлі полк дәрежесіне ие болады. Алғашқы жылдары әскери қызметшілер шатырларда тұрып, барлық күш-жігер инфрақұрылымды қалыптастыруға жұмсалған. Бүгінде полк заманауи базамен жабдықталып, әскери қызметшілер мен олардың отбасылары үшін барлық жағдай жасалған.

«Жиырма бес жылдан астам уақыт таулы-егерлі полк бірегей әскери бөлім ретінде өз мәртебесін сақтап келеді. Әртүрлі жарыстарда бірнеше мәрте жүлделі орын иеленуі, сондай-ақ Армиялық халықаралық ойындардың ат спорты марафонында жеңіске жетуі бөлімдегі жауынгерлік дайындықтың жоғары деңгейде екенін дәлелдейді. Біздің полк – жай ғана әскери құрылым емес, бұл – намыс, тәртіп пен өзара қолдау бағаланатын нағыз отбасы. Біз алдыңғы командирлер мен әскери қызметшілер қалыптастырған жауынгерлік дәстүрлерді құрметтеп, сақтаймыз», дейді полк командирінің тәрбие және идеология жөніндегі орынбасары Қыдырәлі Әшірбаев.

Әскери бөлім жылдың екі мерзімінде Отан алдындағы борышын өтейтін жас буындармен толықтырылып отырады. Осылайша кешегі ерлердің жолын жалғаған жауынгерлер ер үстінде қырағылықпен бейбіт елдің тыныштығын күзетіп келеді.

Нұрболат АМАНБЕК

Соңғы жаңалықтар