ШҚО да ақтүтекте жол аршыған жандар бар

Шығыс Қазақстан облысында апта бойы аяз тұр. Күн райының бұзылуына байланысты жолдар жабылып, көлік қозғалысына шектеу қойылды.

Бұл күндері жол қызметкерлеріне дамыл жоқ. Олар күн, түн демей жолдарды тазалап, қар құрсауында қалып қойған жолаушыларды құтқарып жатыр.

Өзіне сенген осындай жүргізушілер алысқа кетпейді. «112» қызметінің ескертуін елемей кеткендер әдетте діттеген жеріне жете алмай, қар құрсауында батып қалады. 

Осындай жандарға бірінші болып көмекке келетіндердің бірі - Райымхан Нұрбаев. Ол Алматы-Өскемен тас жолындағы №30-шы жол пайдалану учаскесінің бригадасын басқарады. Бұл бағытпен күніне 8 мың көлік қатынайды.

Райымжан Нұрбаев, №30 жол пайдалану учаскесінің аға шебері:

- Әуежайға, вокзалға асығатын жандар болады. Тіпті шұғыл түрде ауруханаға баруы керек адамдар болуы мүмкін. Осы жандардың жолдары ашық тұрсын деп біз күндіз-түні жұмыс істеп жатырмыз.

Ол үшін ауа райының құбылуы жұмысқа шықпауға себеп емес. Райымхан Нұрбаев бригадасымен бірге боранда жол тазалап, батып қалған жолаушыларды құтқарады. Кей кезде өздерінің техникасы сынып қалады. Әріптестері оны жауапты маман ретінде таниды.

Дәурен Серікқанов, №30 жол пайдалану учаскесінің бас инженері:

- Райымхан аға жол саласында 22 жыл еңбек етіп келе жатқан тәжірибелі маман. Тұңғыш ұлын осы салаға жетелеп, оның кәсіби жолын ашқан. Өз іс шебері ретінде ҚазАвтоЖол ұжымы ішінде сыйлы, беделді азаматтардың бірі.

Нағыз еңбек адамы екі жыл бұрын зейнет жасына толды. Бірақ жұмыстан қол үзген емес. Қазір жылдар бойы жинаған тәжірибесін жастардың бойына сіңіріп, білгенін үйретіп жүр. Жалпы облыстағы республикалық бағыттарда жүзден аса маман қызмет етеді.

Еркін Итжанов, «ҚазЖарСервис» ЖШС ШҚОФ инженері:

- Жолдарға 100 бірлік техника жұмылдырылған. Одан бөлек 150 адам тәулік бойы қар тазалауға шығады. Олар жол қауіпсіздігін қамтамасыз етеді.

Синоптиктердің болжамы бойынша, өңірде 40 градустық аяздар әлі сақталады. Одан кейін қар жаууы ықтимал. Бұл ретте жол қызметкерлері тұрғындарға алыс сапарға шықпауға кеңес береді.

Авторлары: Айдарбек Айтмұхамбетұлы, Әнел Есенбердина, Жігер Бабақанов