Жаңа кәсіп игерген жандар

Абай облысында қазір 10 мыңға жуық адам жұмыссыздар тізімінде.

Биыл оларды тұрақты және субсидияланатын жұмыспен қамту жоспарланып отыр. Жұмыссыз азаматтар кәсіптік оқытуға жіберіліп, мамандық алып шыға алады. Қазір 343 адам түрлі мамандық бойынша білім алып жатыр. 

Назым Ноғаева Үржар ауданының Мақаншы ауылында туып-өскен. Жоғары оқу орнын есепші мамандығы бойынша тәмамдағанымен, тұрақты жұмыс таба алмаған. Биыл мансап орталығына жүгініп, жұмыссыз ретінде тіркелген. Осы жерде ол қысқа мерзімді курстан өтіп, тігінші мамандығын меңгерді. Назым бұл кәсіпке бала кезінен қызығушылығы болғанын айтады. Бүгінде жүрек қалауына сай мамандықты игеріп, еңбек етіп жүр.

Назым Ноғаева, тігінші:

- Кәсіп өте ұнайды. Өзім бала кезден бастап апамның қолында өскеннен кейін тігіншілікке қызығатынмын. Қазір осы мамандық бойынша жұмыс жасап жатырмын. Аллаға шүкір. Маған ұнаған себебі сағат 17:00-де үйде боламыз. Балаға да көңіл бөлеміз, жұмыстан ерте шығамыз.

Кәлима Оңғарбаева, тігінші:                      

- Назым өте кішіпейіл, қарапайым, еңбегіне адал. Тиянақты адал жан. Жақсы тіл табыстық. Адамның өзінің ынатасы болуы керек. Ынтасы болса әр жұмыс оңай істелінеді.

Қазір мен тұрған тігін фабрикасында 100-ден астам әйел еңбек етеді. Олардың 15-і еңбек мобильділігі орталығында арнайы курстан өтіп, кәсіпорында жұмысқа орналасқан. Шеберлер медициналық және арнайы жұмыс киімдерін тігумен айналысады. Тігін шеберханасына еліміздің түкпір-түкпірінен, сондай-ақ Ресей секілді шет мемлекеттерден де тапсырыстар келіп түседі.

Жыл басынан бері 343 адам қысқа мерзімді кәсіптік оқуға жолданды. Олардың 246-сы жұмыс берушілердің сұранысы бойынша оқытылса, 33 азамат түрлі кәсіпорында білім алды. Ал 64 адам жылжымалы оқу орталығы арқылы кәсіби дағдыларын жетілдірді. Бүгінде еңбек нарығында тракторшы, дәнекерлеуші, аспаз, кондитер және бухгалтер мамандықтарына сұраныс жоғары.

Еркебұлан Тұрсын, облыстық Еңбек мобильділігі орталығының директоры:

- Биылғы жылдың ерекшелігі шалғайдағы елдімекендерде оқыту курстарын, жылжымалы оқыту курстарында ұйымдастырдық. Оқу барысында 45 мың теңге жұмыс берушінің ұсынысы бойынша түскен өтінімдерді 45 мың көлемінде шәкіртақы алады. Ал егер жұмыс берушінің жұмыс базасында оқыса 80 мың теңге көлемінде жалақы алуға мүмкіншіліктері бар.

Қысқа мерзімді оқыту курстарынан өткендердің 60 пайыздан астамы тұрақты жұмысқа орналасқан. Еңбек мобильділігі орталығының мамандары келер жылы да 300-ден астам адамды оқытуды жоспарлап отыр.

Авторлары: Рүстем Қайратұлы, Медет Өмірханов