Жаңа мамандықты игерген сарбаздардың әскердегі ынтымағы елді тәнтті етті

Әскердегі ынтымақтастық мемлекеттің қауіпсіздігін нығайту мақсатында әскери-саяси, техникалық және білім беру салаларындағы өзара тиімді, тең құқықтық қарым-қатынасты көрсетеді. Яғни осы келісімдер негізінде ортақ қорғаныс қабілетін арттыруды, тәжірибе алмасуды, бірлескен оқу-жаттығуларды және қару-жарақпен қамтамасыз етеді. Біздің әскердегі сарбаздары осындай оқу-жаттығу бағдарламасымен толық қамтылған. Сондықтан сан түрлі мамандық иелерінің  әскерде борышын өтеп жүргенін көруге болады. Соның бірі – Павлодар қаласындағы Ұлттық ұланның 5512 әскери бөлімі. Егор Савельев, Андрей Жидяев пен Владимир Давлетгариев есімді қатардағы жауынгерлер қосымша мамандықты игеріп алған, – деп хабарлайды Aikyn.kz.

Оның екеуі Шығыс Қазақстан облысының тумасы болғанымен, екі бөлек ауылдан. Егор Савельев – Шығыс Қазақстан облысы, Алтай қаласы, Новополяковка ауылының тумасы, жасы – 22-де.  Ол Алтай қаласындағы Алтай жоғары колледжінде  «Ауыл шаруашылығы өндірісінің  тракторшы-машинисі» мамандығы бойынша білім алған. Кран жүргізіп, магистральдық құбырларға жер қазып жұмыс істеген. Кейін әскерге түскенде трактор жүргізіп, әскери бөлім аумағындағы қар шығарып, техниканың ақау тұсын қалпына келтірген. Ал қатардағы жауынгер Андрей Жидяев Шығыс өлкесінің Ұлан ауданы, Асубұлақ ауылында дүниеге келген. Әскерге дейін Өскеменде құрылыс жұмысында кран тізгіндеп, трактор жүргізген.

Үшінші сарбаз Владимир Давлетгариев – Қостанай облысы,   Федоров ауданы, Пешковка ауылының тумасы.

Оның айтуынша, ол көлікті 13 жасынан бастап тізгіндеуді үйренген.  Сол кезде ағасымен бірге Т-40 тракторын басқарып, егістікте жер жыртып, егін жинаған. Бар-жоғы 20 жастағы жігіт комбайн, К-700 техникаларын жүргізген. Қосымша Қостанайдағы ауыл шаруашылығы колледжінде «электр газбен дәнекерлеуші» мамандығын алған.

– 13 жасымнан бастап үлкен ағамның жанында жүріп, трактор жүргізуді үйрендім. Әскерге дейін егістік алқабында жер жыртып, жұмыс істедім. Кетерімде жаз бойы жүргізген тракторды тазалап, жауып кеткенмін. Кейін әскерге келгенімде көк тракторды көріп, көзіме оттай басылды. Содан болар әскери өмірде де техника жүргізуден қол үзбедім. Трактордың қыр-сырын жетік білген бізге экскаватор жүргізу, бульдозер басқару,  комбайнның тілін үйрену оңайға түсті. Қазір осы  техникаларды үйдегі көлігімізден артық күтіп ұстаймыз, – дейді  Владимир Давлетгариев.

Бүгінде қатардағы жауынгерлер көк трактормен әскери бөлімге тиісті аймақтың қарын күреп,  жер қазып, тағы да  басқа шаруашылық жұмысты атқарып жүр.