Әскердегі сарбаздардың да жаңажылдық тілектері орындалды

Осындай сәт биыл ҚР ІІМ Ұлттық ұланының әскери бөлімдеріне жетіп, сарбаздарды қуантты, – деп хабарлайды Aikyn.kz.

Жаңа жыл қарсаңында Ұлттық ұланның Бас қолбасшысы, генерал-майор Аңсаған Балтабеков мерзімді әскери қызметін өтеп жүрген сарбаздардың бес бірдей арманын орындады. Осы істі жүзеге асыру үшін әскер қатарында арнайы сауалнама жүргізіліп, сарбаздар өз тілектерін жинақтады. Дегенмен сарбаздар қызмет барысында армандарының орындалатынын күтпеген.

Атап айтсақ, Тараз қаласындағы 5513 әскери бөлімінің әскери қызметшісі Александр Мирошин бұрын-соңды ұшаққа мініп көрмегенін және көкке көтерілуді армандаған. Оның бұл тілегі Ұлттық ұлан Бас қолбасшысының қолдауымен орындалды. Ұшудың алғашқы сәтінен-ақ сарбаздың қуанышы мен толқуы айқын байқалды.  Алайда жаңажылдық қуаныш мұнымен аяқталған жоқ. Қонған сәттен кейін Александрды тағы бір тосын сый - анасымен қауышу күтіп тұрды.

Сарбаздың анасы Наталья Мирошина бұл күні ұлының ғана емес, өзінің де арманы орындалғанын жеткізді. Себебі әскердегі баласымен жүздесу — Жаңа жылда көп отбасылар аңсайтын ең қымбат сый.

 Ал Алматы қаласындағы 5571 әскери бөлімінің әскери қызметшісі Райымбек Бақытбек шоколад өнімдерінің қалай дайындалатынын көргісі келген. Бас қолбасшының жаңажылдық тартуы ретінде оған еліміздегі танымал «Рахат» кондитерлік фабрикасына экскурсия ұйымдастырылды. Сарбаз тәтті өнімдердің өндіріс технологиясымен танысып, Қазақстанның танымал брендіне айналған фабриканың жұмысын өз көзімен көрді.

Алатау қаласындағы 6654 әскери бөлімінде қызмет ететін Дастан Нұрлан Жаңа жыл қарсаңында бүкіл ротасына мерекелік көңіл күй сыйлауды армандап, бір жәшік мандарин тіледі. Ұлттық ұлан Бас қолбасшысынан келген сәлемдемені ол өзіне ғана қалдырмай, қарулас достарымен бөлісіп, бөлімшеге ортақ қуаныш сыйлады.
Өскемен қаласындағы 5518 әскери бөлімінің қатардағы жауынгері Элербек Сұлтанқұлов сурет салуды қайта бастағысы келетінін айтқан. Оның тілегін орындау үшін шығармашылыққа арналған құрал-жабдықтар кешкі тексеріс кезінде табысталды. Сарбаз үшін ерекше есте қаларлық сәт болды.

Осы әскери бөлімде қызмет ететін қатардағы жауынгер Жүніс Қарабаевтың тілегі де көпшіліктің жүрегін елжіретті. Ол отбасының суреті бейнеленген шыныаяқ армандаған. Генерал-майор Аңсаған Балтабеков табыстаған бұл сый сарбаз үшін туған үйін, жақындарын және алыста жүрсе де сезілетін жылулықты еске салатын қымбат белгіге айналды.
Айта кету керек, Қазақстан Республикасы ІІМ Ұлттық ұланында мерзімді әскери қызметшілердің материалдық қамтамасыз етілуімен қатар, олардың моральдық-психологиялық жағдайына да ерекше көңіл бөлінеді. Жаңа жыл қарсаңында орындалған тілектер сарбаздар үшін құқықтық тәртіп әскерлеріндегі қызметтің жарқын әрі жылы естелігіне айналатыны сөзсіз. Осындай сәттерде қолбасшылық тарапынан көрсетілген қолдау мен жанашырлықтың маңызы арта түсіп, әскери қызметшілерге деген қамқорлықтың әрдайым басты назарда екенін айқын көрсетеді.