Әскердегі жауынгерлер айырылмас досқа айналады

Отан алдындағы белгіленген мерзімді қызметін адалдықпен, абыроймен және жоғары тәртібімен өткерген сарбаздарға құрмет көрсетіп, олардың ата-аналарына алғысхаттар тапсырылды.

Жедел стратегиялық командалық-штабтық «Айбалта – 2025» оқу жаттығуында оқу-жауынгерлік тапсырмаларды орындау кезінде жауынгерлік әзірліктің жоғары нәтижесін көрсеткені үшін қатардағы жауынгерлер Рамазан Төлен мен Юсуф Уринбаев ҚР Қарулы Күштері Құрлық әскерлерінің Бас қолбасшысы, генерал-майор Мереке Көшекбаевтың мақтау грамоталарымен марапатталды.

Сонымен бірге қатардағы жауынгерлер Рүстем Сидаков, Бекзат Аяпов, Дидар Аушев «Шығыс» өңірлік қолбасшылығы әскерлерінің қолбасшысы, генерал-майор Жеңіс Мараловтың алғысхатын алды. Әскерден естелік ретінде сарбаздың біріне құлаққап, біріне сағат пен Абайдың қара сөздері жазылған қалта кітабы тарту етілген. Жалпы, оларға қандай сыйлық табыстайтынын  әр рота командирі өзі шешеді.

Бітіруіне аз қалған сарбаз қостанайлық Дидар Аушев әскери өмірдің ұнағанын айтты. «Бір жыл өтті де кетті. Әскерде ерте тұруды, тапсырманы уақытында орындауды, өз артыңды жинауды, үй ішін сыйлауды, тәртіпке үйретті. Оған қоса, физикалық тұрғыда шынығып, қару қолдануды үйрендім. Әскерге келгеніме еш өкінбеймін. Көп дос таптым. Біздің топта 44 бала бар. Бәрі дос емес, бауырымдай болып кетті. Қазір солар шет-шетінен үйлеріне кетіп жатыр. Тіпті, қимайсың», – деді Мотостар бөлімі 2-ротасының бөлімше командирі.

Қабанбай батыр атындағы 11-танк бригадасының 10810 әскери бөлімінен басталған баспасөз-туры 10181 әскери бөлімінің оқу корпусында жалғасты. Мұнда танкіге қарсы басқару құрылғысы туралы 10810 әскери бөлімі рота командирінің тәрбие және идеологиялық жұмыстар жөніндегі орынбасары, лейтенант Қуаныш Сәлімбеков айтып берді.

Оның сөзінше, қолданылатын ракетаның екі түрі бар. «Соның бірі – 9 м 113 ракетасы. Салмағы – 22 келі, ұшу қашықтығы – 4 шақырымға дейін. Бұл қаруды әскери техникада да, жерден де атуға болады», – дейді Қуаныш Сәлімбеков.

Танк ішінде нысананы көздеу, оған дәлдеп ату бойынша сарбаздар әуелі теориялық сабағын өтіп, оқу-жаттығу кешенінде жаттығады.

–  Жаңадан келген сарбаз сабақ кестесіне сай әуелі бір ай бойы теория жүзінде оқиды. Кейін оқу-жаттығу кешенінде танк жүргізіп, атқызып үйретеміз. Жауынгер толыққанды дайын болғанда ғана әскери көлікке отыра алады. Міне, сол кезде тапсырма да беріледі, – деді подполковник Әділет Идришев.

10810 әскери бөлімі командирінің жауынгерлік және дене даярлығы жөніндегі орынбасары, подполковник Әділет Идришевтің айтуынша, оқу тренажері Т72 танкісінің көздеп атушы танк командирі және механик-жүргізуші мамандарын дайындауға мүмкіндік береді.

– Жауынгер 1 500, 1 600, 1 700 метр қашықтықта тұрған үш нысананы өздері есептеп, дәлдеп, көздеп атуы тиіс. Сол үшін үш оқ-дәрі беріледі. Қателік жіберген жағдайда радио желісі арқылы оператор айтып түсіндіреді. Одан соң әрі қарай жүруге рұқсат етіледі. Бастысы жанар-жағармайдың, оқ-дәрінің және мотосағаттың еш шығыны жоқ. Теориялық жағынан дайын болған соң тапсырманы оқу полигонында жауынгерлік машинада орындайды, – деді ол.

Осы дайындықта жүрген қатардағы жауынгерлер Манғазы мен Амангелді бір-бірінен ажырамас досқа айналған. Екеуі Семейдің тумасы. Десе де, алғаш Семей қаласындағы әскери  комиссияда танысқан.

–  Қазір екеуміз 1-танк батальоны 1 танк ротасындамыз. Екеуміз бір танкіні басқарамыз. Ол – менің командирім, мен оның маман көздеушісімін. Шынын айтқанда, бір үйдің баласындай боп кеттік. Өз басым, әскерге келгеніме еш өкінбеймін. Теледидар мен кинодан көріп жүрген танкті бүгінде өзім жүргізіп, нысананы көздейтін болдым, – дейді қатардағы жауынгер Манғазы.

Журналистер механик-жүргізушілер мен зеңбірекші-танк операторлары әрі жаяу әскердің жауынгерлік машиналарын дайындау процесіне де қатысты. 10810 әскери бөлімі командирінің техникалық қамтамасыз ету жөніндегі орынбасары, подполковник Такижан Тохтиев әскери техника мен қару-жарақты қысқы пайдалану кезеңіне көшірудегі әзірлік деңгейін баяндап берді.

«Т72 – кеңес үкіметінен келе жатқан танкі. Оған қажетті құрал-сайманды 32388 жөндеу әрі қалыпқа келтіру базасы негізінде әскери қоймадан алынады. Қазір паркте 100-ге жуық танк бар, оның істеп тұр», – деген подполковник Такижан Тохтиев әскери техникаға қажетті ұсақ-түйек құрал-сайманын өздері дайындап алатынын да жасырмады.

Қатардағы жауынгер Әділет Жақсыбаев Жөндеу ротасы автомобиль взводының жөндеу маманы ретінде істегеніне 11 айдан асқан.

– Бірінші танк батальонының тапсырысы бойынша қаруға платс жасап шығару керек. Яғни, әскери техникада қаруды орнатқан кезде оның астына қойылатын құрал. Әзірге бұрғы құрылғысының төртеуі дайын, енді біреуі қалды, – дейді  Әділет Жақсыбаев.

Аягөз гарнизонындағы баспасөз-туры «Оңтүстік» әскери қалашықты да ұмыт қалдырмады. Елімізге белгілі әскери қалашықта әскери қызметшілердің тыныс-тіршілігі түгелдей қамтылған. Оның аумағында 18 көпқабатты тұрғын үй,  спорттық кешен, төрт мектеп, балабақша мен әскери емхана бар.

«Әйгерім» би ансамблінің меңгерушісі, хореограф сарбаздардың өмірі тек әскери тапсырмамен шектелмей, адам жанына сыйлайтын рухани кештердің өтетінін сөз етті. Жақын арада өткен республика күніне мерзімді қызмет әскерилері мен «Әйгерім» би ансамблі бірлесе концерттік кеш өткізген.

– Біздің ансамбльге тек қызметкерлердің балалары қатысады. Әскери қызметшілердің балалары бос қалмау мақсатында ұйымдастырылғандықтан, мұнда бәрі тегін. Әр байқауға қажетті киімді балалардың ата-аналары өздері тіктіреді. Біз талай республикалық және халықаралық байқаулардың жеңімпазы атандық. Мысалы, биыл Астанада өткен байқаудың жолақысын, жатын орнын генерал-майор Мереке Көшекбаев көтерді. Сөйтіп, Түркия, Латвия елдеріне жолдаманы жеңіп алдық. Қазір соған қызу дайындық жүріп жатыр. Оның үстіне, әскери гарнизон әскери қалашақ ішінен бізге дайындық залын, яғни студиясын ашып беріп, қолдау көрсетіп отыр, – дейді Әйгерім Омарбекқызы.

Қазір ансамбль құрамында 64 баладан құралған 4 топ бар.