Әскердегі ең бойшаң сарбаз

Елдегі ең бойшаң сарбаз Отан алдындағы борышын Маңғыстауда өтеп жатыр. Әлішер Назымбектің бойы 2 метр 9 сантиметр. 

20 жастағы Әлішер Назымбек Ақмола өңірінің тумасы. Кәсіптік білім беру ұйымын «Өрт қауіпсіздігі» мамандығы бойынша аяқтаған. Әскерге өз еркімен келген. Бала шағынан бойшаң болған ол мектеп партасына отырудың ыңғайсыз болғанын еске алады.

Әлішер Назымбек, сарбаз:                   

- Менің бойым нағашы атама ұқсаған. Яғни нағашы жаққа тартқан. Үйге кіреберісте сыртқы есіктер болады ғой. Есіктен еңкейіп өтемін және киім табу қиын болады. Мен оларды тапсырыс беріп тіктіртемін. Колледжде оқып жүрген кезімде 2 жыл кикбоксингпен, волейболмен айналыстым.

Әлішер отбасыдағы 6 баланың үлкені. Айтуынша, бауырлары да бойшаң. Жас жауынгерге 49-размерлі аяқ киім оңайлықпен табылмапты. Әскери бөлім басшылығы оған киім-кешекті арнайы тапсырыспен тіктірген. Жауынгерлер ұйықтайтын кереует бойына шақ келмеген соң, ұзартуға тура келді. 

Алпысбай Мұстафин, рота старшинасы:

- Стандарт төсегіміз 190 сантиметр. Біздің солдатымыздың бойы ұзын болғандықтан төсекті ұзартып 30 сантиметрге создық. Жайлы жатуы үшін бәрін жасап қойдық.

Нұрбол Шалабаев, Ақтау гарнизоны баспасөз қызметінің жетекшісі:

- Теңіз жаяу әскері бригадасы Қазақстанда жалғыз болғандықтан бұл жаққа іріктеу өте қатаң түрде жүргізіледі. Біріншіден, денсаулыққа байланысты. Бойына, салмағына аса мән береміз. Бұл уақытқа дейін бізде мұндай сарбаздар қызмет атқарған. Бойлары 2,8 метр, 2,3 метр және 2,4 метр болған. Соған орай бригадамыз мұндай әскери қызметшілерге барлық жағынан дайын. 

Теңіз жаяу әскері бригадасында 600-ге жуық адам «Жас сарбаз» курсын оқып жатыр. Елдің түкпір-түкпірінен келген жастар 15 қарашада әскери ант беру рәсіміне қатысады. Ең бойшаң жауынгер келешекте жоғары білім алып, офицер болуды армандайды.

Авторлары: Талғат Исламұлы, Саламат Бекбаев