Еліміздегі ең бойшаң сарбаз Абай облысында қызмет етіп жүр

Абай облысындағы әскери гарнизонда елдегі ең бойшаң сарбаз қызмет етіп жүр.

Қатардағы жауынгер Илья Хальчуковтың бойы 2 метр 10 сантиметр. Ол әскерге баруды өзі қалаған. Бойдың ұзындығы қызметке кедергі емес, керісінше саптық дайындық пен дене шынықтыру нормативтерін орындау кезінде пайдасы бар, дейді Илья. Оның жеке ерекшелігін ескерген бөлім басшылығы да барлық қажетті жағдайды жасаған. Сарбаздың әскери киімі мен аяқ киімі жеке тапсырыспен тігілген. Ал жатын орыны бойына сай бейімделді. Бойшаң сарбаз Петропавл қаласының тумасы, мамандығы автокөлік жөндеуші. Бөлімдегі әскери техниканың жарамды күйде болуына жауап береді.

Илья Хальчуков, қатардағы жауынгер:

- Мен әрдайым бойшаңдығыммен көзге көп түсемін, алайда бұл маған кедергі емес. Әскерде бастысы сыртқы келбет емес, тәртіп, жауапкершілік және әскери борышты орындауға әзір болу екенін түсіндім. Мұнда өз орнымды таптым және Отан алдында борышымды өтеп жүргенімді мақтан тұтамын.