ШҚО да есірткі зертханасын ұйымдастырған екі ер адам 11 жылға сотталды

Белгілі болғандай, тәртіп сақшылары олардан 76 келіден астам есірткі тәркілеген.

ШҚО қылмыстық істер жөніндегі мамандандырылған ауданаралық сотының мәліметінше, сотталғандар 2025 жылдың қаңтар айынан бастап белгісіз тұлғаның жетекшілігімен Самар ауданынан тұрғын үй сатып алып, оны психотроптық заттар өндіретін зертхана ретінде жабдықтаған. Заңсыздыққа ҰҚК департаментінің қызметкерлері тосқауыл қойды.

— Тінту барысында жалпы салмағы 76 келіден асатын α-PVP психотроптық заты, арнайы құрал-жабдықтар мен химиялық прекурсорлар тәркіленді. Сот отырысында айыпталушылар кінәларын толық мойындап, өкінетіндерін білдірді, — делінген ақпаратта.

Сот шешімімен екеуі 11 жылға бас бостандықтарынан айырылды. Тәркіленген құрал-жабдықтар мен заттар жойылып, зертхана орналасқан үй мемлекет кірісіне тәркіленді. Үкім әлі заңды күшіне енген жоқ.

Еске салсақ, бұған дейін Түркістанда әйелін психиатриялық орталыққа мәжбүрлеп жатқызған ер адам сотталғаны хабарланған.