Пашинянға қастандық ұйымдастырған адам екі жылға сотталды

Арменияның апелляциялық қылмыстық соты қару-жарақты, оқ-дәрілер мен жарылғыш заттарды заңсыз сатып алып, тасымалдап және сақтағаны үшін қарулы жасақ командирі Ашот Минасянды екі жылға бас бостандығынан айырды, деп хабарлайды Arasha.kz.

Бұл туралы мәлімет datalex.am сайтында жарияланды.

Сот бірінші инстанцияның 1 жыл 10 ай шартты жаза беру туралы шешімін жойып, оны дәл осы мерзімге колонияға қамау туралы үкім шығарды.

Еске салайық, Ашот Минасян 2020 жылдың 14 қарашасында Армения премьер-министрі Никол Пашинянға қастандық жасауға дайындалған іс бойынша ұсталған болатын. Тергеу мәліметінше, оның үйінен көп мөлшерде қару мен оқ-дәрі табылған. Сондай-ақ, Минасянның телефон арқылы қастандықтың егжей-тегжейін талқылаған әңгімелерінің жазбалары жарияланған еді.

Онымен бірге Арменияның бұрынғы ұлттық қауіпсіздік қызметінің директоры Артур Ванецян, бұрынғы депутат Ваграм Багдасарян және АРФ «Дашнакцутюн» партиясының мүшесі Ашот Авагян да ұсталған.

Алайда көп ұзамай олардың барлығы айғақтардың жеткіліксіздігіне байланысты босатылды. Арменияның Бас прокуратурасы бұл шешімге наразылық білдіріп, іс Жоғарғы кассациялық сотқа жіберілді. Кассациялық сот төменгі соттардың бірқатар маңызды мән-жайларды ескермегенін айтып, істі қайта қарауға жіберді.

Нәтижесінде 2021 жылдың 1 желтоқсанында Минасян қайта қамауға алынып, бір айдан кейін, қаңтарда, қолхатпен босатылған болатын.