ШҚО ның 93 елді мекенінде интернет жоқ

Шығыс Қазақстан облысының 93 елді мекенінде интернет жоқ. 

Жер бедері күрделі болғандықтан, таулы жерлерге желі жүргізу оңай емес, дейді жауаптылар. Жергілікті билік байланыс операторларымен бірлесіп, түрлі әдісін қарастырып жатыр. Антенналы-матчты діңгек қойғанның өзінде таралу аумағы тар. Сондықтан мамандар мәселені шешудің басқа жолын ұсынып отыр. 

Яғни оптикалық талшықты кәдімгі электр бағандарының үстімен жүргізуге болар еді дейді. Алайда бұл жобаны  энергетиктер әзірге қолдай қоймады.

Жер бедері күрделі  аумақтардың бірі Алтай ауданы. Интернетпен қамту жағынан қиындық көп. Әсіресе таудың ортасында тұрған Серебрянск қаласында проблема өзекті. Қаланың бір жартысы еңісте , қалған бөлігі қырға қарай салынған. 

Эльмира Ахметова, тілші:

- Биылға дейін ғаламтор желісін тарататын құрылғы осы орталық қазандықтың мұржасының  ұшына орналастырылған екен.өйткені бұл қаладағы  ең биік нүкте. Алайда кейінгі уақытта заңға қайшы деп танылып ол құралдар алынып тасталған.Енді антеналы діңгекті орнататын жер табу қиынға соғуда.

Ұялы байланыстың да сапасы нашар. Елена Прокопьева аурухана келіп, енді үй-ішіне хабарласа алмай әлек. Айтуынша, қаланың шеткері жағындағы жұрт біреумен тілдесу үшін байланыс жақсы ұстайтын жер іздейді.

Елена Прокопьева,  қала тұрғыны:

-  Ата-анам Поперечка деген ықшам ауданда тұрады.Оларға хабарласып халін білу мүмкін емес. Ал өздері қоңырау шалу үшін терезенің дөңнің басына, орталыққа қарай шығып арнайы бір нүктелерді іздейді.

Әкімдік өкілдері барлық  әдісті қарастырып жатырмыз дейді. Операторларға электр шамдарына арналған бағандарды қолдануға да рұқсат беріпті.

Нұргүл Бақынова, қала әкімі:

- Былтыр операторлардың бірі электр шамдары арқылы оптикалық талшықтар тартып шықты. Алайда бұл жұмсысты әрі қарай жалғастыра алмады. Өйткені электр бағандары да жетпейді. 

Ал жоғары вольтты электр энергиясын тасымалдайтын бағандарды рұқсатсыз қолдануға болмайды. Сондықтан ұялы байланыс мекемесінің өкілдері оны пайдалану үшін энергетикалық компанияға бірнеше өтініш жолдады. Бірақ ол тарап әзірге бұл ұсынысты қолдаған жоқ.

Әйгерім Арғынбай, біріккен энергосервистік компаниясы баспасөз орталығының бас менеджері:

- Серебрянск қаласындағы электр желісін тексеріп шықтық. Алайда ол бағандар бойымен оптикалық талшық тарту қауіпті. Әрі электр желісі де тозып тұрғанын ескеру керек.

Цифрлық басқарма мамандары бағандарды байланыс мұнарасына айналдыру мәселесі әлі де талқыланады дейді. Әзірге ауыл-аймақ пен жол бойында қойылатын антенналы-матчты діңгектер санын арттыру көзделуде. Жалпы бір жылда 47 ауыл интернет желісіне қосылған. Дегенмен, 93 елді мекен бұл игілікті әлі  күтіп отыр.

Эльмира Ахметова, Жігер Бабаханов