ШҚО жолдарындағы су басу қаупі жоғары учаскелер саны азайды

Бұл көрсеткішке инженерлік жұмыстардың нәтижесінде қол жеткізілді. Атап айтқанда, көпірлер салу, қосымша су өткізгіш құбырлар орнату және жол инфрақұрылымын нығайту жұмыстары жүргізілген.

– 2024 жылдың қорытындысы бойынша бізде 13 су тасқыны қаупі бар учаске болған. Өткен жылы көпірлер салынып, су өткізгіш құбырлар орнатылды. Қазіргі таңда мұндай учаскелердің саны бесеу ғана, - деді «ҚазАвтоЖол» ұлттық компаниясы ШҚО филиалының директоры Нұрбек Темірханов.

Бүгінде өңірдегі республикалық маңызы бар жолдардың жалпы ұзындығы 1 238 шақырымды құрайды. Онда 88 көпір және мыңнан астам су өткізгіш құбыр орналасқан. Олар еріген қар суының қауіпсіз өтуін қамтамасыз етеді.

– Су басу қаупі бар учаскелердің барлығында су тасқынына қарсы шаралар жүргізіліп, жолды су басу қаупін азайту үшін қорғаныс үйінділері тұрғызылды. Біз тұрақты түрде рейдтік тексерулер жүргізіп, жағдайды бақылауда ұстап отырмыз, - деді Жол активтері сапасы ұлттық орталығы ШҚО филиалының бөлім басшысы Саяхат Мұсапыров.

Сонымен қатар жол қызметтері су тасқыны қаупіне жедел әрекет ету үшін қажетті материалдарды дайындап қойды. Атап айтқанда, 2 000 м³ құм-қиыршық тас қоспасы, 10 мың ыдыс-қап дайындалды.

– Өңірде жедел әрекет ету үшін арнайы апаттық бригадалар құрылған. Қар қарқынды еріген кезеңде олар жолдардың ең күрделі учаскелерінде тәулік бойы кезекшілік атқарады, - деді «Қажсервис» ЖШС ШҚО филиалының директоры Нияз Садықов.

Еске салсақ, осыған дейін жолдардағы су шаю қаупі бар 229 учаске Көлік министрлігінің бақылауына алынғаны хабарланған.