Абай облысындағы 6 аудан су басу қаупі жоғары аумақта тұр

«Қазгидромет» РМК Абай облысы бойынша филиалының мәліметінше, бүгінгі таңда Ақсуат, Аягөз, Абай, Жарма, Бородулиха, Бесқарағай, Көкпекті аудандары мен Семей қаласында қар қоры мол жиналған. 

— Жазық жерлерде қардың қалыңдығы 2-55 см аралығында. Бірқатар ауданда топырақтың тоңы 105-136 см-ге жеткен. Мамандар Ақсуат, Аягөз, Бесқарағай, Бородулиха, Жарма және Көкпекті аудандарын су басу қаупі жоғары аумақтарға жатқызып отыр. Күннің күрт жылынуы, жаңбыр немесе қардың жаууы өзендерде мұз кептелісін туындатып, шағын өзендер мен уақытша су арналары арқылы су тасқыны қаупін арттыруы ықтимал, — делінген ақпаратта.

Абай облысы аумағындағы жергілікті маңызы бар автокөлік жолдарының жалпы ұзындығы 4 462 шақырымды құрайды. Жол бойында 162 көпір және 1 745 су өткізу құбыры орналасқан.

— Сондай-ақ өңірдегі жалпы ұзындығы 733 шақырым теміржол желісінің бойында 265 көпір және 330 су өткізу құбыры бар. Қазіргі уақытта жергілікті маңызы бар көлік және теміржолдардағы су өткізу құбырлары қардан тазартылып жатыр. Облыс аумағындағы елді мекендерден 300 мың текше метрден астам қар шығарылған, — деп хабарлады облыс әкімдігінен.

Өткен жылдардағы су тасқыны кезеңдерінің қорытындысы негізінде облыстық маңызы бар автомобиль жолдарында 9 учаске және аудандық маңызы бар жолдарда 10 учаске су өту қаупі жоғары аймақ ретінде анықталды. Аталған аумақтар ерекше бақылауға алынған.

Еске салсақ, осыған дейін ШҚО-да су тасқыны кезеңіне жоғары дайындық режимі енгізілгені хабарланған.