Шри Ланка визалары қазақстандықтар үшін тегін болуы мүмкін

Шри-Ланка Қазақстанды қоса алғанда, 40 елдің азаматтары үшін визалық алымды уақытша алып тастауы мүмкін. Бұл туралы ақпарат ел парламентінің 2026 жылғы 7 мамырда иммиграция және эмиграция туралы заң аясында жаңа ережелерді мақұлдаған шешімінен кейін белгілі болды, - деп хабарлайды Tengri Travel тілшісі VisasNews-ке сілтеме жасап.

Шри-Ланка Қазақстанды қоса алғанда, 40 елдің азаматтары үшін визалық алымды уақытша алып тастауы мүмкін. Бұл туралы ақпарат ел парламентінің 2026 жылғы 7 мамырда иммиграция және эмиграция туралы заң аясында жаңа ережелерді мақұлдаған шешімінен кейін белгілі болды, - деп хабарлайды Tengri Travel тілшісі VisasNews-ке сілтеме жасап.

Әңгіме бір жыл мерзімге берілетін туристік сапарларға арналған 30 күндік тегін виза туралы болып отыр. Дегенмен, әзірге жүйе әдеттегі режимде жұмыс істеп тұр: ETA - электронды кіру рұқсатын әлі де тек төлем жасағаннан кейін ғана рәсімдеуге болады. Шри-Ланка билігі жаңа ережелердің іске қосылатын ресми күнін әлі жариялаған жоқ.

БАҚ-та жарияланған мәліметтерге сәйкес, бұл бағдарлама туризм саласын қолдау шараларының бір бөлігі болуы тиіс. Билік визалық алымды алып тастау қосымша 247 мыңға жуық туристі тартуға көмектеседі және саяхатшылардың ел ішіндегі шығындары есебінен ел экономикасына 300 миллион доллардан аса табыс әкеледі деп үміттеніп отыр.

Визаны тегін жасау жоспарланған елдер тізіміне Қазақстан, Ресей, Қытай, Үндістан, Ұлыбритания, АҚШ, Германия, Франция, Оңтүстік Корея, БАӘ және тағы бірнеше ондаған мемлекет енді. Бұған дейін тегін виза схемасы жеті елдің - Қытай, Үндістан, Индонезия, Жапония, Малайзия, Ресей және Тайланд азаматтары үшін қолданыста болған еді.

Бұл ретте мынаны түсіну маңызды: әңгіме толық визасыз режим туралы болып отырған жоқ. Жаңа ережелер күшіне енгеннен кейін де саяхатшыларға бәрібір ETA - электронды сапар рұқсаты қажет болады. Өзгерістер тек визалық алымға қатысты: сауалнама толтыруды және сапар алдындағы алдын ала рәсімдеуді ешкім алып тастамайды.

Шри-Ланканың қоғамдық қауіпсіздік және парламенттік істер министрі Ананда Виджепаланың сөзінше, ETA-ны сақтап қалу қауіпсіздік мәселелеріне де байланысты. Яғни, төлем алып тасталғанына қарамастан, елге кіру бақылауда болады.

Біз жүйенің Қазақстан азаматтары үшін жұмыс істей бастаған-бастамағанын нақтылау мақсатында Шри-Ланканың Ресейдегі елшілігіне сауал жолдадық. Дипломатиялық өкілдік бағдарламаның іске қосылғаны туралы әлі ресми хабарлама алмағандарын айтты.

"Қазіргі уақытта елшілік Қазақстанды қоса алғанда, 40 ел үшін визалық алымдардың жойылғаны туралы ресми хабарлама алған жоқ, ал eta.gov.lk сайты визаларды ақылы негізде рәсімдеуді жалғастырып жатыр. Ресми растаудан кейін ақпарат елшілік сайтының виза бөлімінде жарияланады", - делінген хатта.

Сондай-ақ онда мынадай ескерту жасалды: егер турист виза ақысын қазір төлеп, ал жаңа ережелер келесі күні күшіне енсе, ақшаны қайтару мүмкін болмайды.

Айта кетейік, қазір көптеген елдердің, соның ішінде Қазақстан азаматтары үшін стандартты 30 күндік туристік ETA онлайн рәсімдеу кезінде 50 доллар (шамамен 24 мың теңге), ал әуежайға келген кезде 60 доллар (шамамен 29 мың теңге) тұрады.

ETA рұқсаты Шри-Ланкаға қысқа мерзімді сапарлар үшін 2012 жылдан бастап міндетті болып табылады. Ол бастапқыда 30 күнге беріледі және қажет болған жағдайда ел ішінде ұзартылуы мүмкін.

Google News арқылы жаңалықтарымызды қадағалаңыз