Шұңқырларды балшықпен толтырып жатыр: Қазақстанның оңтүстігіндегі жол жөндеуі видеоға түсіп қалды

Жетісу облысының тұрғыны Алакөл ауданындағы автожол жөндеу жұмыстарының сапасына наразылық білдірді. Ер адам жұмысшылардың жолдың жүру бөлігіне толыққанды асфальт төсеудің орнына, шұңқырларды кәдімгі құм мен балшықпен толтырып жатқан сәтін видеоға түсіріп алған, деп хабарлайды Tengrinews.kz тілшісі.

Видео әлеуметтік желілерде тарап, санаулы сағат ішінде мыңдаған қаралым мен көптеген пікір жинады. Сөз болып отырған жол - Алакөл ауданындағы Арқарлы ауылына баратын, ұзындығы 60–70 шақырымды құрайтын трасса. Видео авторы терең шұңқырларды күрекпен топыраққа толтырып жатқан жұмысшылар тобымен сөйлескен сәтін телефонға түсірген.

"Жігіттер, мен осы жердің тумасымын, мына жұмыстарыңды көріп жаным ашиды. Бұл - кәдімгі көзбояушылық. Технологиялар заманында емес, 90-шы жылдары өмір сүріп жатқандай кәдімгі балшықты салып жатырсыңдар. Билік бұл тасжолды жаңартуға қомақты қаражат бөлгеніне сенімдімін. Алғашқы жаңбыр мен қардан кейін бұл "жұмыстарың" шайылып кетеді де, қайтадан шұңқырлар пайда болады. Олар жүргізушілер үшін дөңгелектің жарылуы немесе картердің зақымдануы сияқты үлкен қауіп төндіреді. Мұндай жұмыс істеп, халықты алдағанша, мүлдем жөндемегендерің жақсы еді", - деді видео авторы.

Instagram-дағы бұл жарияланымды көру

Адыл Бейсенбаевтың (@taldykorganec_kolesa) жарияланымы

Бұл жазбаны жергілікті блогерлер де бөлісіп жатыр. Олар әлемде жасанды интеллект игеріліп, ғарыштық технологиялар дамып, инновациялар енгізіліп жатқанда, Жетісу облысы өз соқпағымен жүруді ұйғарды деп отыр. Қоғам белсенділері өңір прокуратурасынан жол жөндеу жұмыстарының сапасына баға беріп, қажет болған жағдайда тиісті шаралар қолдануды сұрады.

"Сұрақ туындайды: бұл жол жөндеу технологиясына сәйкес келе ме? Алакөл ауданында қыс қатал, мұндай "жөндеу технологиясы" жүргізушілер үшін қосымша қауіп төндіруі мүмкін", - делінген видеолардың бірінің астында.

Айта кетерлігі, бұл ақпарат облыс әкімі Бейбіт Исабаевтың Алакөл ауданы тұрғындарымен кездесуінен кейін бірден жарияланды. Кездесуде өңір басшысы жол сапасы мәселесін қозғап, облыстық маңызы бар тасжолдарды жөндеуге 45 миллиард теңгеден аса қаражат бөлінгенін, оның ішінде 3 миллиард теңгеден аса қаражат Алакөл ауданына тиесілі екенін айтқан болатын.

Алакөл ауданының әкімдігі бұл жағдайға қатысты жауап берді. Онда Арқарлы ауылына баратын облыстық маңызы бар автожолды (39-шы және 59-шы шақырым аралығы) орташа жөндеу жұмыстары 2026–2027 жылдарға жоспарланғаны, ал қазіргі шұңқырларды толтыру жұмыстарын мердігер өз бастамасымен және өз қаражаты есебінен жүргізіп жатқаны айтылған.

"Қазіргі уақытта "Жетісу Жол Құрылыс" ЖШС мердігерлік ұйымы қысқы кезеңде жол қозғалысы қауіпсіздігін қамтамасыз ету мақсатында өз қаражаты есебінен шұңқырларды қатты жабынмен (ҚГҚ) толтыру жұмыстарын жүргізіп жатыр. Аталған учаскені орташа жөндеу жұмыстары 2027 жылы қолайлы ауа райы жағдайында, жобалау-сметалық құжаттамаға сәйкес орындалады", - деп хабарлады Жетісу облысы Алакөл ауданы әкімдігінің баспасөз қызметі.

“Нағыз “футболға“ айналдырды“: Тоқаев жолдарға байланысты шенеуніктерді сынады

Еске сала кетейік, 28 қазанда Қасым-Жомарт Тоқаев Қазақстан халқына Жолдауында шенеуніктерді тасжолдардың қанағаттанарлықсыз жағдайы үшін сынға алып, республикалық және жергілікті маңызы бар автожолдардың сапалы құрылысын қамтамасыз етуді талап еткен болатын. Ол елдегі барлық автожолдарды сапалы салу міндеті тұрғанын мәлімдеді.

"Ережелер мен регламенттерді алға тартқан орталықтағы және жергілікті атқарушы органдар нағыз "футбол" ұйымдастырды. Мәселені бір-біріне сілтеп, оны шешудің орнына тығырыққа тіреді", – деген болатын бұған дейін Қасым-Жомарт Тоқаев.

Мемлекет басшысы еліміздегі барлық автожолдарға, мейлі ол республикалық болсын, мейлі әкімдіктердің қарамағындағы жергілікті жолдар болсын, жауапкершілікті Көлік министрлігі арқылы үкіметке жүктеуді тапсырды.

Бізді Google-дың негізгі дереккөздер тізіміне қосыңыз