Швеция еліне оралғысы келетін мигранттарға берілетін жеңілдіктерді арттырады

Швецияның көші-қон агенттігінің баяндамасында көрсетілгендей, қаржы азаматтардың отанына оралу туралы шешім қабылдауында маңызды рөл атқармайды.

Сауалнамаға қатысқан респонденттердің көпшілігі (61%) Швецияда қалуға ниетті, тек 18% өз еліне қайтып оралуды қарастырады. Мигранттар үшін эмоциялық факторлар өте маңызды. Олар қауіпсіздікті сезініп, отбасымен қайта қауышу мүмкіндігі және қайтып оралған кезінде қолдау табуды қалайды.

Агенттік елге сәтті оралу барлық кезеңдерде сүйемелдеуді және шыққан елінде көмекті қажет ететінін атап өтті. Есепте сондай-ақ тәуелсіз консультациялық қызмет құру және ақпараттық жұмысты күшейту ұсынылады.

Ақпараттық науқанға 3,5 миллион крон ($324 000) жұмсалғанымен, биыл 111 өтініш түсіп, тек бір адам жәрдемақы алды.

Йокмокк муниципалитеті үкіметтің ерікті түрде қайтару мәселесі бойынша ынтымақтастыққа шақыруын қабылдамады.

- Бізге қоғамдастықта тұратын барлық адамдар қажет және біз өскіміз келеді, — деді муниципалитет басшысы Роланд Боман.

Йокмокктен кейін көптеген муниципалитеттер жұмыс күшін жоғалтудан және жаңадан келгендерге жағымсыз сигналдардан қорқып, бағдарламаға қатысудан бас тартты.

Көші-қон министрі Йохан Форселл бұл бағдарлама ерікті болып қала беретінін және қазірдің өзінде интеграцияланған мигранттарға емес, үйіне қайтқысы келетіндерге арналғанын айтты.

Бұған дейін Швеция үкіметі еңбекақы салығын азайтуға ниетті екенін жазған болатынбыз.