Швейцария әскер жасындағы украиналықтардың елде тұруына шектеу енгізді

АСТАНА, 19 тамыз – Sputnik. Швейцария 20 тамыздан бастап әскери міндеттерін орындағанын растайтын құжаты жоқ, әскер жасындағы украиналықтарға тұруға рұқсат беруді тоқтатады. Бұл туралы Федералдық кеңестің мәлімдемесінде айтылды.

Бұған дейін Еуропалық одақ әскери міндетті украиналықтарға уақытша қорғау мәртебесін беруді тоқтататынын хабарлаған болатын. ЕО Кеңесі 31 шілдеден бастап ЕО елдеріне кірген, әскерге шақыру жасына жеткен украиналықтардан әскери міндеттерін орындағанын құжат жүзінде растауды талап етті. Мұндай құжат болмаған жағдайда уақытша қорғау мәртебесі бұдан былай берілмейді.

"Швейцария ЕО Кеңесінің бұл шешімін орындауға міндетті емес. Соған қарамастан Федералдық кеңес ел мүддесі үшін өз тәжірибесін ЕО-ға мүше мемлекеттердің ұстанымымен сәйкестендіру қажет деп санайды. Осыған байланысты бұдан былай S қорғау мәртебесі Украинадағы өздеріне жүктелген әскери міндеттерін орындайтын адамдарға ғана беріледі", — деп хабарлады үкімет.

Аталған шектеу әскер жасындағы украиналықтарға, резервте тұрған азаматтарға, сондай-ақ қарулы күштер қатарына өз еркімен қосылған адамдарға қатысты болады.

Бұл шара 2026 жылғы 20 тамыздан бастап берілетін барлық өтінішке қолданылады. Алайда аталған мәртебеге ие болып отырған адамдарға бұл талап әсер етпейді, деп мәлімдеді билік.