Шығыс Қазақстанда елдегі биік көпірлердің бірінің құрылысы басталды

АСТАНА, 10 қазан – Sputnik. Шығыс Қазақстан облысында бірегей нысанның құрылысы жүріп жатыр, деп хабарлады "ҚазАвтоЖол".

Осинов асуында республикалық маңызы бар "Өскемен – Алтай – Үлкен Нарын – Катонқарағай – Рахман қайнары" автожолының 56-72 шақырымында Пихтовка өзенінің үстінен өтетін жаңа көпірдің құрылысы жүргізіліп жатыр.

"Аталған нысан аймақ үшін стратегиялық маңызы бар жоба. Көпір пайдалануға берілген соң, бұл бағыттағы қозғалыс жыл бойы қауіпсіз және ыңғайлы болмақ. Сонымен қатар, нысан еліміздегі ең биік көпірдің бірі болады", - деп жазылған хабарламада.

Бүгінде жағалаулық және аралық тіректерді орнату, тұғырларды нығайту, бетондау және арматуралау жұмыстары жүргізіліп жатыр. Жұмыстар таулы аймақтың күрделі табиғи жағдайларында жүргізіліп жатқанын да айта кету керек.

Бұл жоба тек инженерлік құрылыс қана емес, өңірдің болашағына апарар көпір, дейді компаниядағылар. Ол туризмді дамытуға, сауданы арттыруға және жергілікті елді мекендердің әлеуметтік-экономикалық әлеуетін күшейтуге зор мүмкіндік береді.